Şimal-qərb bölgəsində 650 hektardan çox sahədə tütün əkiləcək FOTO
Zaqatala, 21 fevral, Mustafa Dadaşov, AZƏRTAC
“Azərtütün” ASC-nin Zaqatala rayonunun Aşağı Tala kəndində yerləşən tütün istehsalı və emalı məntəqəsində tütün şitillərinin yetişdirilməsi işlərinə başlanılıb.
AZƏRTAC-ın bölgə müxbiri emal məntəqəsinin istixana təsərrüfatında olub, tütün şitillərinin yetişdirilməsi işlərinin gedişi ilə maraqlanıb.
Emal məntəqəsinin müdiri Qabil Hacıyev bildirib ki, tütün şitillərinin yetişdirilməsi üçün məntəqənin ərazisində 4 ədəd ABŞ istehsalı olan və 3 ədəd Azərbaycanda istehsal edilən istixana quraşdırılıb. ABŞ-da istehsal olunan istixanaların hər biri 35 hektar, yerli istixanaların hər biri isə 27 hektar sahəni tütün şitili ilə təmin edir. Ümumiyyətlə, məntəqədəki istixanalarda yetişdirilən tütün şitili ilə 230 hektaradək sahəyə şitil köçürmək mümkün olacaq. Qalan sahələrə isə fermerlərin öz təsərrüfatlarındakı sadə istixanalarda yetişdirdikləri şitillər köçürüləcək.
Səhmdar Cəmiyyətin Zaqatala, Qax və Balakən rayonları üzrə Aqronomiya Departamentinin müdir müavini Elnur Məmmədli ilə söhbət zamanı məlum oldu ki, builki mövsümdə şitil yetişdirilərkən ABŞ-dan gətirilən NC-291 növlü tütün toxumu ilə yanaşı, sınaq məqsədilə Fransadan gətirilmiş ITB-6184 növlü toxumdan da istifadə edilir. Şitillər müasir, yəni hidroponik üsulla yetişdirilir. Departament rəsmisinin sözlərinə görə, hazırda ASC-nin Qax rayonundakı tütün istehsalı və emalı məntəqəsində də mövsümə hazırlıq işləri görülür. Şirkət tərəfindən məntəqədəki 2 istixana təmir edilib, örtüyü dəyişdirilib və işə salınıb. İstixanada yeni istilik sistemi də quraşdırılır.
Şitilin yetişdirilməsi prosesinə gəlincə, toxum xaricdən gətirilmiş torfla qatışdırılaraq, hər biri 300 gözdən ibarət plastik kasetlərin içərisinə yerləşdirilir. Toxum qoyulmuş kasetlər daha sonra istixananın içərisindəki su hövzəsinə buraxılır. Su hövzəsinə əvvəlcədən tələb olunan gübrə və dərmanlar tökülür. Tütün şitilləri 40-45 gün ərzində yetişəcək və daha sonra sahələrə köçürüləcək.
Şitillərin hava şəraitindən asılı olaraq, aprelin birinci yarısında sahələrə köçürülməsi nəzərdə tutulur. Hazırda tütün əkiləcək sahələr şumlanır, malalanır. İndiyədək 650 hektaradək sahədə don şumu aparılıb.
Qeyd edək ki, builki mövsümdə “Azərtütün” tərəfindən respublikamızın şimal-qərb bölgəsinə daxil olan Balakən, Zaqatala, Qax, Şəki və Oğuz rayonlarında 650 hektardan çox sahədə “Virciniya botaniki” növlü tütün əkilməsi nəzərdə tutulur. Tütün istehsalı ilə əlaqədar cəmiyyət tərəfindən bu günədək 60 fermerlə müqavilə bağlanılıb və hazırda proses davam etdirilir. İndiyədək fermerlərlə bağlanılan müqavilələr üzrə tütün əkiləcək sahə 436 hektar təşkil edir. Bundan əlavə, şirkətin özü tərəfindən də bu il 216,5 hektar sahədə tütün əkilməsi nəzərdə tutulur.
Bölmənin digər xəbərləri
