ŞİMALİ KOREYANIN HAZIR NÜVƏ SİLAHI YOXDUR
AZƏRTAC-ın İTAR-TASS-dan aldığı xəbərə görə, Rusiya hökuməti sədrinin müavini, müdafiə naziri Sergey İvanov noyabrın 1-də Osloda keçirilən mətbuat konfransında demişdir: “Şimali Koreyanın hazır nüvə silahı yoxdur. Onun təkcə partladıcı nüvə qurğusu var. Rusiya Şimali Koreyanın altıtərəfli danışıqlara yenidən başlamağa razılıq verməsini yalnız alqışlaya bilər. Əminik ki, bu, KXDR-in nüvə proqramı probleminin həllinin hazırda yeganə yoludur. Zənnimizcə, bu danışıqlar konkret nəticələrə gətirib çıxarmalıdır. Razılaşmaların əsas parametrləri aşkardır: bir tərəfdən, bu, KXDR-in təhlükəsizliyinin təminatıdır, digər tərəfdən, Şimali Koreyanın hər cür nüvə proqramlarını sərt beynəlxalq nəzarət altında dayandırmaqdır.
S.İvanov bundan əvvəl bildirmişdi ki, KXDR-ın nüvə probleminə dair altıtərəfli danışıqlar bu il, çox güman Çində başlanacaqdır. Rusiya bu danışıqlarda fəal iştirak edəcək və KXDR-də nüvə sınaqlarının tamamilə dayandırılmasında israrlı olacaqdır.
Bölmənin digər xəbərləri
