Bakı, 13 aprel, AZƏRTAC

Azərbaycan Ordusunun böyük Qələbəsinin doğurduğu nəticələr dünyanın bütün nüfuzlu beynəlxalq təşkilatları tərəfindən qəbul olunub və ölkəmizin işğaldan azad etdiyi, həmçinin Rusiya sülhməramlılarının müvəqqəti məsuliyyət zonasına daxil olan ərazilər üzərindəki suveren hüquqları müzakirə predmeti deyil, ola da bilməz. Prezident İlham Əliyev bu ilin birinci rübünün yekunlarına həsr olunan müşavirədəki nitqində bununla bağlı bütün məqamlara həm ətraflı, həm də faktlara istinad etməklə aydınlıq gətirdi.

Bu fikirləri AZƏRTAC-a açıqlamasında siyasi ekspert Elçin Mirzəbəyli bildirib.

Siyasi ekspertin sözlərinə görə, bütövlükdə həm postmünaqişə dövründə, həm də bu ilin birinci rübündə Azərbaycan Ordusunun işğaldan azad etdiyi ərazilərdə həyata keçirilən tədbirlər, ölkəmizin qatıldığı beynəlxalq platformalarda, ikitərəfli və üçtərəfli görüşlərdə qəbul olunan yekun sənədlər, ayrı-ayrı təsisatların və dövlətlərin müxtəlif platformalarda ifadə olunan mövqeyi dünyanın regionda yaranmış reallıqlara Azərbaycan Respublikasının ərazi bütövlüyünün bərpası, sərhədlərinin toxunulmazlığı müstəvisindən yanaşdığını təsdiqləyir.

“Birləşmiş Millətlər Təşkilatının xətti ilə Azərbaycanın BMT-yə üzvlüyünün 30-cu ildönümü münasibətilə Şuşada keçirilən tədbir sübuta yetirdi ki, bu təşkilat Azərbaycanın ərazi bütövlüyünü istisnasız olaraq tanıyır. Azərbaycan torpaqlarının işğalına son qoymaqla Birləşmiş Millətlər Təşkilatı Təhlükəsizlik Şurasının 28 il ərzində icra olunmayan qətnamələrini yerinə yetirdi və bununla BMT üzərindən olduqca ağır bir yükü götürmüş oldu. Ermənistanın Şuşada keçirilən beynəlxalq tədbirə münasibətdə sərgilədiyi isterik reaksiya da bu hadisənin nə qədər mühüm əhəmiyyətə malik olduğunu nümayiş etdirir”, - deyə E.Mirzəbəyli diqqətə çatdırıb.

Ötən dövr ərzində ölkəmizin digər beynəlxalq təsisatlardakı fəaliyyətinin də kifayət qədər uğurlu olduğunu qeyd edən siyasi ekspert bildirib ki, bu xüsusda dünyanın ikinci ən böyük beynəlxalq təşkilatı olan Qoşulmama Hərəkatını və ölkəmizin bu təsisat çərçivəsindəki uğurlu fəaliyyətini qeyd etmək yerinə düşər. Təsisata üzv dövlətlərin razılığı və dəstəyi ilə Azərbaycanın Qoşulmama Hərəkatına sədrliyinin daha bir il uzadılması dövlətimizə və onun liderinə yüksək etimadın və rəğbətin göstəricisidir. Geridə qalan zaman kəsiyində Azərbaycanın İslam Əməkdaşlıq Təşkilatı çərçivəsindəki fəaliyyəti, eləcə də İƏT-lə ortaq işbirliyi kifayət qədər səmərəli və əhəmiyyətli olub.

Təşkilatın Xarici İşlər Nazirləri Şurasının bu ilin mart ayında keçirilən toplantısında Ermənistanın Azərbaycana qarşı təcavüzünün nəticələri ilə bağlı siyasi, iqtisadi və mədəni məsələləri əhatə edən “Ermənistan Respublikasının Azərbaycan Respublikasına qarşı təcavüzünün nəticələrinin aradan qaldırılması”, “Azərbaycan Respublikasına iqtisadi yardım göstərilməsi”, “Ermənistan Respublikasının təcavüzü nəticəsində Azərbaycanın ərazilərində İslam mədəniyyətinə aid tarixi və mədəni abidələrin dağıdılması” və “Xocalı qırğınının qurbanları ilə həmrəylik” adlı dörd qətnamənin qəbul edilməsi ölkəmizin İƏT çərçivəsindəki uğurlu fəaliyyətinin bariz nümunəsidir.

E.Mirzəbəylinin sözlərinə görə, daha bir beynəlxalq təşkilatın - ATƏT-in də 44 günlük müharibənin nəticələrini qəbul etdiyi bu təşkilatın fəaliyyətdə olan sədrinin Prezident İlham Əliyevlə görüşündə də ifadə olundu və sözügedən təsisatın bölgədəki prosesləri postmünaqişə anlayışı çərçivəsindən dəyərləndirdiyi göz qabağındadır. Baxmayaraq ki, ATƏT-in mandat verdiyi Minsk qrupu və onun həmsədrləri de-fakto fəaliyyətdə olduqları dövrdə Azərbaycanın işğal altında olan torpaqlarının azad edilməsi ilə bağlı təcavüzkara qarşı beynəlxalq təzyiq mexanizmlərinin işə salınması üçün heç bir əməli iş görməmişdilər. ATƏT-in Minsk qrupunun ötən müddətdəki fəaliyyətinin nəticələri, Azərbaycan Prezidentinin də vurğuladığı kimi sıfra bərabər olub. Hazırda isə, Minsk qrupuna münaqişənin həlli üçün verilmiş mandat faktiki olaraq de-yure qüvvədə olsa da, de-fakto etibarsız sayılmalıdır. Çünki Minsk qrupu həmsədrlərinə ATƏT-in fəaliyyətdə olan sədri tərəfindən verilmiş mandatda yer alan müddəaların artıq heç bir əhəmiyyəti qalmayıb. Yəni Azərbaycanın bölgədə yaratdığı reallıqlar ATƏT-in Minsk qrupunun fəaliyyətinə son qoyub. Amma ATƏT bir mötəbər təşkilat kimi, fəaliyyət istiqamətlərinə uyğun olaraq, regionda təhlükəsizliyin və əməkdaşlığın təmin edilməsi üçün Azərbaycan-Ermənistan əlaqələrinin normallaşmasına öz töhfəsini verə bilər.

Siyasi ekspert vurğulayıb ki, Azərbaycanla Avropa İttifaqı arasındakı əlaqələrin intensivliyi, həmçinin Aİ-nin Azərbaycan-Ermənistan münasibətlərinin gələcəyi ilə bağlı mövqeyi qlobal proseslərə ciddi təsir imkanları olan bu subregional təsisatın da regionda yaranmış reallıqlarla razılaşdığını təsdiqləyir. Avropa İttifaqı Şurasının Prezidenti Şarl Mişelin təşəbbüsü ilə ötən ilin dekabrında və bu ilin aprel ayında keçirilən üçtərəfli görüşlərlə bağlı yekun bəyanatlarda “Dağlıq Qarabağ”, “münaqişə” və “Minsk qrupu” ifadələrinin yer almaması da belə düşünməyə tamamilə əsas verir.

Siyasi ekspertin sözlərinə görə, bütün bunlar postmünaqişə dövründə Azərbaycanın öz hədəflərinə doğru inamla addımladığını, qarşıya qoyulan məqsədlərin həyata keçirilməsi istiqamətində ardıcıl və prinsipial bir siyasət yürütdüyünü nümayiş etdirir. Bu siyasətin nəticələri isə göz qabağındadır. Artıq Ermənistan beş baza prinsipini, o cümlədən Azərbaycanın ərazi bütövlüyünü qəbul etdiyini və bu xüsusda ölkəmizə qarşı ərazi iddialarından əl çəkdiyini bildirib.

“Ermənistanın baş naziri Nikol Paşinyanın parlamentdəki son çıxışında beynəlxalq birliyin Qarabağı Azərbaycan ərazisi kimi tanıdığını bəyan etməsi də rəsmi İrəvanın etirafı kimi dəyərləndirilə bilər”, -deyə Elçin Mirzəbəyli bildirib.