Bakı, 18 sentyabr, AZƏRTAC

“Siyasi partiyalar haqqında” yeni Qanunun qəbulu siyasi sistemin inkişafı baxımından mühüm əhəmiyyətə malikdir. Bu, cəmiyyətdə yeni çağırışların, sosial-siyasi tələblərin fonunda dövlətlə siyasi partiyalar arasında əməkdaşlığın güclənməsinə, siyasi dialoq mədəniyyətinin yüksəlməsinə mühüm töhfədir.

AZƏRTAC xəbər verir ki, bu sözləri YAP Yasamal rayon təşkilatının sədri Bəxtiyar Nəbiyev deyib.

O qeyd edib ki, “Siyasi partiyalar haqqında” yeni Qanuna müvafiq olaraq siyasi partiyaların üzvlərinin reyestrlərinin dövlət tərəfindən təsdiq edilməsi radikal cəbhə və sağlam düşüncə arasında necə dərin bir uçurum olması reallığını bir daha üzə çıxardı. Qanunun qəbulundan sonra özünü “ana müxalifət” sayanların təşvişi xüsusi diqqət çəkməyə başlayıb. Radikallar yeni Qanunun “mürtəce xarakter daşıması” kimi çoxsaylı savadsız və məntiqsiz iddialar irəli sürürdü. Qeydiyyat prosesinin gedişatında isə radikalların “narahatlığının” əslində öncədən bəlli olan real mahiyyəti üzə çıxdı. Bir daha aydın oldu ki, əslində, bu qaralama kampaniyasının təməlində antimilli dairələrin reallıqla üz-üzə qalmaq qorxusu dayanırmış.

“Radikalları yeni Qanunda ən çox qorxudan amil isə məhz 5 min tərəfdarın imzalarının toplanması olub. 5 min imza məsələsi bəzi partiyaları ifşa və məyus etdi. Yeni Qanunun qüvvəyə minməsi nəticəsində Azərbaycan ictimaiyyəti bəzi ambisiyalı partiyaların həqiqətdə hansı potensiala malik olduqlarına şahidlik etdi. Bu partiyalar illər ərzində heç bir əsaslı iş görmədikləri üçün adi hüquqi və inzibati proseduralardan keçməkdə belə, çətinlik çəkirlər. Ona görə də sıradan bir inzibati prosedurdan keçməkdə çətinlik çəkən partiyalar heç bir halda bütün xalqın adından danışa bilməz”, - deyə YAP Yasamal rayon təşkilatının sədri əlavə edib.

Diqqətə çatdırılıb ki, yeni Qanunla əlaqədar iqtidarın ünvanına böhtanlar səsləndirən partiyaların nümayəndələri qeydiyyatdan sonra heç nə olmamış kimi davranırlar. Əlbəttə ki, dialoqdan boyun qaçıranlardan hər hansı bir siyasi mədəniyyət gözləmək sadəlövhlükdür. Ötən aylar ərzində radikallar israrla ictimaiyyəti inandırmağa çalışırdılar ki, yeni Qanunun əsas təyinatı bilavasitə onların fəaliyyətinin dayandırılması ilə bağlıdır. İddiaları təsdiqini tapmadı. Demokratik siyasi mədəniyyət tələb edir ki, bütün bu cür davranış, qərəzli yanaşma və sonsuz sayda olan böhtanlara görə həmin partiya rəhbərləri mütləq olaraq xalqdan və iqtidardan üzr istəsinlər.