SOCAR-ın idarə və müəssisələrində 20 Yanvar şəhidlərinin xatirəsi yad edilib
Bakı, 19 yanvar, AZƏRTAC
Azərbaycan xalqının qəhrəmanlıq tarixinin unudulmaz səhifəsi olan 20 Yanvar Ümumxalq Hüzn Gününün 27-ci ildönümü ilə əlaqədar bütün ölkədə olduğu kimi SOCAR-ın idarə və müəssisələrində də silsilə tədbirlər keçirilir və şəhidlərin əziz xatirəsi yad edilir.
SOCAR-ın mətbuat xidmətindən AZƏRTAC-a bildirilib ki, “Azneft” İstehsalat Birliyində (İB) keçirilmiş anım tədbirində baş direktor Daşqın İskəndərov sovet rejiminin Azərbaycana qarşı yönəlmiş hərbi-siyasi təcavüz aktı olan 20 Yanvar faciəsi haqqında məlumat verib. O, təpədən-dırnağadək silahlanmış sovet ordusuna qarşı qəhrəmanlıq dastanı yazan xalqımızın azadlıq əzmindən danışıb. D.İskəndərov 20 Yanvar faciəsinin Azərbaycan xalqının tarixinə milli birlik və özünüdərkin, xalqımızın müstəqillik uğrunda apardığı mübarizənin qəhrəmanlıq rəmzi kimi daxil olduğunu qeyd edib.
Tədbirdə çıxış edənlər 1990-cı ilin Yanvar faciəsinin Azərbaycan xalqının iradəsini, milli azadlıq uğrunda mübarizə əzmini qıra bilmədiyini, həmin müdhiş gecədə həlak olan vətən oğullarının adlarının Azərbaycan tarixinə əbədi həkk olunduğunu vurğulayıblar.
Heydər Əliyev adına Bakı Dərin Özüllər Zavodunda təşkil olunmuş mərasimin iştirakçıları əvvəlcə Azərbaycanın ərazi bütövlüyü uğrunda canlarını qurban vermiş şəhidlərin xatirəsini yad ediblər.
Zavodun direktoru vəzifəsini icra edən Əliağa Səfərov bildirib ki, həmin hadisələrdən 27 il keçsə də, tarix unudulmur. Qeyd olunub ki, həmin qanlı yanvar gecəsində zavodun işçisi Azad Rzayev şəhid olub, Gülmirzə Ağayev isə yaralanıb. Azərbaycanın ərazi bütövlüyü uğrunda gedən döyüşlərdə və 20 Yanvar hadisələri zamanı zavodun əməkdaşlarından 8 nəfər əlil, 12 nəfər şəhid olub.
Tədbirdə çıxış edən zavodun mexanika və energetika şöbəsinin rəisi, Qarabağ müharibəsi veteranı Qabil Allahyarov ümummilli lider Heydər Əliyevin hakimiyyətə qayıdışından sonra 20 Yanvar hadisəsinə siyasi-hüquqi qiymətin verildiyini, həlak olanların xatirəsinin bütün ölkə boyu əbədiləşdirildiyini xatırladıb. O, hər il yanvarın 20-də xalqımızın axın-axın Şəhidlər xiyabanı memorial kompleksini ziyarət etdiyini diqqətə çatdırıb.
Təlim, Tədris və Sertifikatlaşdırma İdarəsinin (TTSİ) Kadr hazırlığının təşkili mərkəzində Qanlı Yanvar faciəsinin ildönümünə həsr olunmuş tədbirdə çıxış edən TTSİ-nin rəisi Fuad Süleymanov deyib ki, Azərbaycan xalqı bu dəhşətli faciəni törədənlərə bu gün də öz dərin nifrətini bildirir.
Vurğulanıb ki, hələ o zaman sovet hökumətinin qanlı siyasətini ifşa edən ulu öndər Heydər Əliyevin qətiyyəti, cəsarəti və müdrikliyi sayəsində 20 Yanvar hadisələrinin əsl mahiyyəti dünya birliyinə çatdırılıb, daha sonra isə bu faciəyə siyasi-hüquqi qiymət verilib. Ümummilli liderimiz Heydər Əliyev 1993-cü ilin iyununda xalqın təkidli tələbi ilə hakimiyyətə qayıtdıqdan sonra 20 Yanvarın Ümumxalq Hüzn Günü elan olunması haqqında Sərəncam imzalayıb. Tədbirin sonunda 20 Yanvar şəhidlərinə həsr olunmuş film nümayiş etdirilib.
20 Yanvar şəhidlərinin xatirəsi Ekologiya İdarəsində keçirilmiş tədbirdə də anılıb. İdarənin rəis müavini Əflatun Həsənov çıxış edərək Azərbaycanın azadlığı və torpaqlarımızın müdafiəsi uğrunda canlarını qurban vermiş soydaşlarımızın ailələrinə dövlətimiz tərəfindən göstərilən diqqət və qayğıdan danışıb, şəhidlərin xatirəsinin xalqımızın qəlbində daim yaşayacağına əminliyini ifadə edib.
Digər çıxış edənlər tarixə “qanlı şənbə gecəsi” kimi həkk olunmuş 20 Yanvar faciəsinin Azərbaycan xalqına qarşı cinayət aksiyası, eyni zamanda, bütün insanlığa qarşı törədilmiş zorakılıq aktı olduğunu qeyd ediblər.
Bölmənin digər xəbərləri
