Qəbələ, 11 fevral, Mustafa Dadaşov, AZƏRTAC

Regionların sosial-iqtisadi inkişafına dair Dövlət proqramlarının uğurla həyata keçirilməsi nəticəsində son 16 ildə respublikamızın bütün şəhər və rayonlarının sosial-iqtisadi mənzərəsi tamamilə dəyişib. Bu illər ərzində regionlarda yüzlərlə yeni istehsal sahəsi, emal və xidmət müəssisələri yaradılıb, nəhəng infrastruktur layihələri icra olunub, on minlərlə yeni iş yeri açılıb.

“Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda Prezident İlham Əliyev birinci dövlət proqramının qəbulundan ötən müddət ərzində ölkə iqtisadiyyatında çox böyük dəyişikliklərin baş verdiyini diqqətə çatdıraraq deyib: “2003-cü ildən bu günə qədər bütövlükdə Azərbaycan iqtisadiyyatı 3,4 dəfə artmışdır. Bu, dünyada rekord göstəricidir. Bütün statistik məlumatlar araşdırıla bilər, inanmıram ki, buna bənzər artım tempi olsun. Bu 16 il ərzində sənaye istehsalı 2,7 dəfə, kənd təsərrüfatı 2 dəfə, xarici ticarət dövriyyəsi 6,4 dəfə, ixrac 7,6 dəfə, o cümlədən qeyri-neft ixracı 5,2 dəfə artmışdır. Bizim valyuta ehtiyatlarımız 27 dəfə artmışdır. 2003-cü ildə valyuta ehtiyatlarımız 1,8 milyard dollar idi, keçən ilin yekunlarına görə 51, indi isə 52 milyard dollara çatmışdır. Yəni, bu, özlüyündə böyük bir göstəricidir”.

Regionların sosial-iqtisadi inkişafına dair Dövlət proqramlarının uğurlu icrası nəticəsində bölgələrin iqtisadi həyatında baş verən müsbət dəyişiklikləri Qəbələ rayonunun timsalında da aydın görmək olar.

Rayon Statistika İdarəsinin rəisi Ayaz İsgəndərov AZƏRTAC-ın bölgə müxbirinə bildirib ki, 16 il ərzində Qəbələ rayonunda iqtisadiyyatın bütün sahələri üzrə ümumi daxili məhsul istehsalı 11,5 dəfədən çox artaraq ötən il 320,2 milyon manat olub. Bu illər ərzində məhsul istehsalı və xidmətlərin həcmi sənayedə 105,6 dəfə, kənd təsərrüfatında 5,3 dəfə, tikintidə 103,2 dəfə, nəqliyyat sektorunda 3,4 dəfə, rabitədə 6,2 dəfə, ticarətdə 11,4 dəfə artıb.

2003-cü ilin oktyabrından 2020-ci ilin yanvarınadək rayonda 21 min 400 yeni iş yeri açılıb. Təkcə ötən il rayonda 2685-i daimi olmaqla, 3206 yeni iş yeri yaradılıb.