SOYDAŞIMIZ KARDİOLOGİYA SAHƏSİNDƏ RUSİYADA ƏN GƏNC ELMLƏR DOKTORUDUR
30 yaşlı Mehman Məmmədov Rusiya Federasiyasında kardiologiya sahəsində ən gənc tibb elmləri doktoru olmuşdur. O, bu yaxınlarda “Metabolik sindromun klinik-biokimyəvi xüsusiyyətləri və onun dərman vasitəsilə tənzimlənməsi” mövzusunda dissertasiya müdafiə edərək, tibb elmləri doktoru alimlik dərəcəsi almışdır. M.Məmmədovun işi o dərəcədə yeni və maraqlıdır ki, kardiologiya sahəsindəki alimlər onun Rusiyada ən yaxşı kardioloqlarından biri olduğunu etiraf etmişlər. Həmvətənimizin doktorluq işində ürək-damar xəstəliklərinin yeni klinik xüsusiyyətləri aşkar edilmiş, onların təzə müalicə metodları təklif olunmuşdur. Onu da deyək ki, Rusiyada metabolik sindrom konsepsiyası ilə ilk dəfə məşğul olan alimlər qrupunun əlaqələndiricisi məhz M.Məmmədovdur.
Bu problemə həsr olunmuş 60-dan çox elmi əsərin müəllifi olan alim Almaniyada, Fransada, İtaliyada, İsveçdə, İsveçrədə, İranda və MDB ölkələrində həmin mövzuda məruzələr etmişdir.
Hazırda Mehman Məmmədov Dövlət Elmi-Tədqiqat Profilaktik Təbabət Mərkəzinin metabolik pozuntular şöbəsinin böyük elmi işçisidir və gənc aspirantlar qrupuna başçılıq edir. O, bu mövzuda elmi fəaliyyətini davam etdirmək və tədqiqatlarının dairəsini dünya standartlarına uyğun surətdə genişləndirmək niyyətindədir.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
