”Sözümüz imzamızdır, adımız simamızdır”- Laçında tədbir
Bakı, 2 noyabr, AZƏRTAC
Azərbaycan Respublikasının Dövlət Dil Komissiyası yanında Monitorinq Mərkəzinin təşkilatçılığı ilə “Heydər Əliyev İli” çərçivəsində Laçın şəhər 2 nömrəli tam orta məktəbdə “Sözümüz imzamızdır, adımız simamızdır” adlı tədbir keçirilib.
Monitorinq Mərkəzindən AZƏRTAC-a bildirilib ki, tədbir “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” ölkə Prezidentinin 2018-ci il 1 noyabr tarixli Fərmanının 5 illiyi münasibətilə təşkil edilib.
Monitorinq Mərkəzinin direktoru professor Sevinc Əliyeva doğma dilimizlə bağlı növbəti tədbirin Azərbaycanın əsrarəngiz gözəlliyə və zəngin təbii sərvətlərə malik diyarlarından birində - Laçın rayonunda keçirilməsindən böyük məmnunluq hissi duyduğunu və tədbirin məhz təhsil müəssisəsində təşkil olunmasının qürurverici olduğunu qeyd edib. Bu əvəzolunmaz hissləri yaşadanlara Müzəffər Ali Baş Komandan, Prezident İlham Əliyevə və rəşadətli Azərbaycan Ordusuna dərin minnətdarlığını ifadə edən professor Sevinc Əliyeva Vətən uğrunda canından keçən şəhidlərin əziz xatirəsini hörmətlə yad edib, qazilərimizə şəfa diləyib.
S.Əliyeva ölkəmizdə dil siyasətinin formalaşması, Azərbaycan dilinin dövlət dili kimi tətbiqi işinin təkmilləşdirilməsi və inkişafında Ümummilli Lider Heydər Əliyevin, həmçinin onun siyasi kursunun layiqli davamçısı Prezident İlham Əliyevin müstəsna xidmətlərini nəzərə çatdırıb, işğaldan azad olunmuş ərazilərimizdə aparılan quruculuq-abadlıq işlərinin sevindirici olduğunu bildirib. Həmçinin bu prosesdə şəhər və kəndlərimizdə yeni yaradılacaq infrastrukturun, ictimai iaşə və digər obyektlərin adlarını müəyyənləşdirərkən dilimizin zəngin söz ehtiyatından istifadə etməklə ədəbi dilimizin normalarının tələblərini gözləməyi tövsiyə edib. Sadalananlara örnək olaraq “Hoçazfilm” yaradıcılıq studiyasının, “Abdallar” istirahət mərkəzinin adlarını qeyd edən professor bu qəbildən olan seçimləri təqdirəlayiq hal kimi də qiymətləndirib.
Azərbaycan Dövlət Reklam Agentliyinin Strateji inkişaf və kommunikasiya şöbəsinin müdiri Elçin Mahir Zəfərdən sonra sahibkarların öz əmtəə nişanların doğma dildə adlandırılmasına və onların təsvirlərində Qarabağ motivli vizualların seçilməsinə üstünlük verildiyini bildirib. O, həmçinin ad seçimində xüsusi olaraq Qarabağdakı toponimlərdən istifadəyə marağın artmasını xüsusi təqdir edib.
“Azərbaycan dili və reklamlarımız” mövzusunda çıxış edən Monitorinq Mərkəzinin direktor müavini dosent Gülarə Əmirova reklam mətnlərində ədəbi dil normalarının tətbiq vəziyyətinin öyrənilməsini dildə gedən proseslərin analitik təhlili baxımından əhəmiyyət kəsb etdiyini vurğulayıb. G.Əmirova qeyd edib ki, reklam mətnlərində ədəbi dilin üslubi imkanlarından yaradıcılıqla istifadə olunmaması, fonetik, leksik və qrammatik tələblərin gözlənilməməsi dilin ümumi inkişafına təsirsiz ötüşmür. O, reklam mətnlərində xarici dillərə məxsus söz və ifadələrin kütləvi surətdə işlədilməsinin səbəblərini açıqlayıb, bu qəbildən olan istilahların reklam mətnlərinin üslubuna mənfi təsir göstərməklə onların anlaşılmasına da mane olduğunu vurğulayıb.
“Azərbaycan dilinin saflığının qorunması və düzgün tətbiqində Monitorinq Mərkəzinin rolu” adlı məruzə ilə çıxış edən şöbə müdiri Vəfa İsmayılova bildirib ki, yaxın gələcəkdə bu torpaqlarda fəaliyyətə başlayacaq radio və televiziya kanallarında, çap və elektron mediada dilimizin saflığının qorunmasına, ədəbi dil normalarına riayət olunmasına əməl ediləcək, abad Qarabağımızın füsunkar gözəlliyi, adət-ənənəsi, görülən işlər media nümayəndələri tərəfindən oxucular və dinləyicilərə peşəkarlıqla çatdırılacaq.
Əməkdar jurnalist Mətanət Ağamirli, dosentlər Mərziyyə Nəcəfova, Sevda Əliyeva və başqaları bütün sahələrdə ana dilinin saflığının qorunmasının vacibliyini vurğulayıb, İKT, reklam, tibb və digər sferalarda da dilin düzgün tətbiqi məsələlərinə xüsusi həssaslıqla yanaşılmağın zəruriliyini qeyd ediblər.
Tədbir əsnasında Mərkəzin aparıcı mütəxəssisləri Gülnar İsmayılova və Günel Pənciyeva şagirdlərə interaktiv təlim keçib, fərqlənən 10 şagirdə müxtəlif hədiyyələr təqdim ediblər.
Gənc nəslin vətənpərvərlik və azərbaycançılıq ideologiyası ruhunda tərbiyə edilməsi, milli kimliyimiz olan Azərbaycan dilinə sevginin şagirdlərə aşılanması, dövlət dilinin təbliğindəki xidmətlərinə görə Laçın şəhər 2 nömrəli tam orta məktəbin direktoru Sevinc Cabbarova fəxri fərmanla təltif olunub.
Bölmənin digər xəbərləri
