Stolüstü tennis üzrə Azərbaycan çempionatına yekun vurulub
Bakı, 6 mart, AZƏRTAC
Gənclər və İdman Nazirliyinin və Azərbaycan Stolüstü Tennis Federasiyasının 5 mart - Bədən Tərbiyəsi və İdman Günü münasibətilə təşkil etdiyi ölkə çempionatına yekun vurulub.
AZƏRTAC xəbər verir ki, turnirin bağlanış mərasimində çıxış edən federasiyanın vitse-prezidenti Fazil Məmmədov gənclərin fiziki və mənəvi cəhətdən sağlam böyümələri istiqamətində idmanın və bədən tərbiyəsinin inkişafına Azərbaycan dövlətinin göstərdiyi diqqət və qayğıdan danışıb. Fazil Məmmədov ölkəmizin idman imicinin yüksəldilməsi, idmanın maddi-texniki bazasının möhkəmləndirilməsi, bölgələrdə müasir idman infrastrukturunun yaradılması istiqamətində görülən tədbirlərdən bəhs edib.
Çempionatda respublikanın şəhər və rayonlarından 60-dan çox idmançı iştirak edib. Şəxsi, komanda, qoşa və qarışıq qoşa yarışlarında Bakı, Sumqayıt, Şəki, Şirvan, Salyan, Gədəbəy, Samux və digər rayonların təmsilçiləri mübarizə aparıblar. Stolüstü tennisçilər ümumilikdə 9 kişi və 7 qadın komandanın heyətində çıxış ediblər.
Azərbaycan çempionatının yekununda qaliblərə federasiyanın diplom və mükafatları təqdim olunub.
Bölmənin digər xəbərləri
