“SÜLH VƏ SABİTLİK PREZİDENTİ”
“Təhsil” nəşriyyatında yenicə çapdan çıxmış kitab müəllif sözü, dörd fəsil və istifadə olunmuş ədəbiyyat siyahısından ibarətdir. Nəşrin elmi redaktoru siyasi elmlər doktoru Rövşən Mustafayevdir.
Kitabda Prezident İlham Əliyevin siyasətə gəldiyi vaxtdan etibarən keçdiyi yola ətraflı nəzər salınır. Müəllif Azərbaycanın gənc liderinin siyasətçi kimi formalaşmasını ardıcıl izləyir və onun fəaliyyətini müxtəlif prizmalardan təqdim edir. Biz burada İlham Əliyevi Azərbaycan Dövlət Neft Şirkətinin birinci vitse-prezidenti, Milli Olimpiya Komitəsinin rəhbəri, Milli Məclisin AŞPA-dakı nümayəndə heyətinin başçısı, bu qurumun sədr müavini və büro üzvü, Baş nazir və nəhayət, müstəqil Azərbaycanın Prezidenti kimi görürük. Diqqəti çəkən cəhət budur ki, müəllif bütün bunları, sadəcə, ümumi şəkildə, mücərrəd formada deyil, hər dəfə konkret faktlar əsasında, bəzi hallarda isə tanınmış xarici siyasətçilərin, politoloqların söylədikləri fikirlərə istinad etməklə oxucuya çatdırır.
Kitabda dövlətimizin başçısının bu ali vəzifədə olduğu müddətdə daxili və xarici siyasətinə, bunun müsbət nəticələrinə geniş yer verilmişdir. Müəllif ölkəmizin sosial-iqtisadi inkişafı, beynəlxalq aləmdə Azərbaycanın mövqelərinin daha da möhkəmləndirilməsi sahəsində görülən ardıcıl və məqsədyönlü işləri dövlət başçısının fəaliyyətinin öncül istiqamətləri kimi xüsusi vurğulayır.
Bütün bunlarla yanaşı, İlham Əliyevin fəaliyyətinin hansı sahəsindən bəhs edilməsindən asılı olmayaraq, kitabda belə bir fikir daim vurğulanır ki, o, Heydər Əliyev məktəbinin yetirməsi, onun siyasi xəttinin layiqli davamçısıdır. Bu siyasətin isə Azərbaycanda alternativi yoxdur. Çünki bu siyasət Azərbaycanı dağılmaqdan, məhv olmaqdan xilas edib və indiki mərhələdə onun davam və inkişaf etdirilməsi isə Azərbaycanı hərtərəfli inkişaf etmiş qüdrətli ölkəyə çevirəcəkdir. Müəllif əminliklə vurğulayır ki, fəaliyyətində ümummilli liderimizin ideallarını rəhbər tutan və xalqımızın dəstəyinə arxalanan Prezident İlham Əliyev ölkəmizə çoxdan gözlədiyimiz daimi və möhkəm sülhü, Azərbaycanda sosial-iqtisadi inkişafın yüksək səviyyəsini təmin edəcəkdir.
Bölmənin digər xəbərləri
