SUMO ÜZRƏ BİRİNCİ AZƏRBAYCAN ÇEMPİONATININ QALİBLƏRİ MƏLUM OLMUŞDUR
AZƏRTAC xəbər verir ki, Maştağa Olimpiya İdman Kompleksində sumo üzrə birinci Azərbaycan çempionatı keçirilmişdir.
100-dən çox sumoçunun iştirak etdiyi yarışın nəticələrinə əsasən, Əmrah Əhmədov (60 kq, “Ruslan” ), Elvin Hümbətov (80 kq, “Ruslan”), İlqar Qarayev (100 kq, “Kanokan TT”) yeniyetmələr, Teymur Əhmədov (85 kq, “Neftçi”), Hacı Sultanov (115 kq, “Pəhləvan”) isə gənclər arasında ölkə çempionu adını qazanmışlar.
Nəhayət, yaşlı idmançıların mübarizəsində Samir Əliyev (85 kq), Nizami Qafarov (115 kq) və Vasif Səfərbəyov (115 kq-dan yuxarı) fəxri kürsünün ən yüksək pilləsinə qalxmışlar. Xatırladaq ki, sonuncu idmançı daha çox sambo üzrə yarışlarda iştirakı ilə tanınır. “Neftçi” İdman Sağlamlıq Mərkəzinin yetirməsi Rəşad Bagiyev isə mütləq Azərbaycan çempionu adını qazanmışdır.
Qeyd edək ki, qədim yapon güləş növü olan sumo ölkəmizdə yenicə təşəkkül tapmağa başlayır. Birinci Azərbaycan çempionatı gələcəkdə bu idman növündə perspektivli sumoçuları aşkarlamaq baxımından əhəmiyyətli olacaqdır. Artıq bu yarışda fərqlənmiş sumoçular iyunda Budapeştdə keçiriləcək Avropa çempionatında Azərbaycanın idman şərəfini qoruyacaqlar.
Bölmənin digər xəbərləri
