Sumqayıt Dövlət Dram Teatrı 52-ci mövsümün açılışına hazırlaşır
Sumqayıt, 17 sentyabr, Ətrabə Rzayeva, AZƏRTAC
Sumqayıt Dövlət Dram Teatrı 52-ci mövsümünün virtual açılışını sentyabrın 18-də Üzeyir Musiqi günündə gerçəkləşdirəcək. Teatrın yeni mövsümdə ilk tamaşası olacaq M.F.Axundzadənin “Müsyo Jordan və Dərviş Məstəli Şah” komediyası onlayn formatda təqdim ediləcək. Meydan-məzhəkə üslubunda ərsəyə gəlmiş tamaşanın quruluşçu rejissoru teatrın baş rejissoru, Xalq artisti Firudin Məhərrəmovdur.
Teatrın direktoru, Əməkdar artist Mübariz Həmidov AZƏRTAC-a bildirib ki, hər yeni mövsümdə dönüb geriyə baxmaq, uğurları xatırlamaq, yarımçıq qalmış işlərin davamını tamamlamaq barədə düşünmək teatrın ümumi inkişaf konsepsiyasına töhfə verə bilər. Elə bu baxımdan 51-ci mövsümdə hansı işlərin görüldüyünü, hansı problemlərin olduğunu və əlbəttə, hansı uğurlu layihələrə imza atıldığını xatırlamaq yerinə düşər.
“2019-cu ildə Prezident İlham Əliyevin Cəfər Cabbarlının yubileyi ilə bağlı imzaladığı Sərəncama müvafiq olaraq ədibin “Solğun çiçəklər” faciəsini repertuara daxil etdik”, - deyən teatrın rəhbəri bildirib ki, bu əsərin səhnə versiyasını işləmək televiziya və kino rejissoru kimi yetərincə tanınmış Elşən Zeynallıya həvalə olundu. Onun maraqlı bədii yaradıcılığı, ənənəvi mövzuya kreativ yanaşma məharəti öz müsbət nəticəsini göstərdi. “Solğun çiçəklər” hər kəsi heyrətləndirə bildi. Demək olar ki, ölkənin bütün sənət ocaqlarında, müxtəlif məktəblərin nümayəndələri tərəfindən hazırlanmış “Solğun çiçəklər” Sumqayıt teatrında tam fərqli səhnə taleyi yaşadı. Mütəxəssislər tamaşaya yüksək qiymət verdilər.
Ötən mövsümün uğurlarından danışan M.Həmidov Sumqayıtın şəhər statusu almasının 70 illiyinə həsr olunmuş, teatrın sifarişi ilə tanınmış dramaturq Əli Əmirli tərəfindən yazılmış “Sevgilim Sumqayıt” monumental tamaşasını da vurğulayıb. Bununla yanaşı, Əməkdar artist Namis Şirməmmədov Cəlil Məmmədquluzadənin “Danabaş kəndinin əhvalatları” povestini səhnələşdirərək quruluş verib, eyni zamanda, dahi Üzeyir Hacıbəylinin “O olmasın, bu olsun” komediyasının məşqlərinə başlanılıb. Həmçinin baş rejissor, Xalq artisti Firuddin Məhərrəmov Əbdürrəhim bəy Haqverdiyevin “Xortdanın cəhənnəm məktubları” və tanınmış teatrşünas Aydın Talıbzadənin “Tubinot” əsərlərinin eksplikasiyasını hazırlayıb.
“Uzun müddətdir ki, teatr monotamaşa hazırlamırdı. Əslində monotamaşa aktyorlardan böyük oyun məharəti, plastika, improvizə tələb edir, onu formada saxlayır, fiziki hazırlıqla ruhun vəhdətini təmin edir. Dekorasiyalarla oyun qurmaq, işıq-səs effektlərini oyunun tərkib hissəsinə çevirmək, tamaşaçını diqqətdə saxlamaq, doğrudan da, aktyordan xüsusi istedad tələb edir. Gənc yazıçı Ülviyyə Heydərovanın “Uşaqlıq” pyesi Xalq artisti F.Məhərrəmova, “Pələng” monopyesi isə gənc rejissor Ümid Abbasova həvalə olundu. “Uşaqlıq” monotamaşasında təhkiyəçi gənc və istedadlı aktyor İlahə Səfərova və “Pələng” əsərində isə Kamran Muradlıdır. Hər iki əsər insan psixologiyasının dərin qatlarına nüfuz edir. Digər yaradıcı kollektivdən dəvət olunan Gülnar Hacıyeva Azərbaycan xalq nağılı əsasında “Göyçək Fatma”nı balacalar üçün hazırlamağa başladı. Təəssüf ki, dünyanı bürümüş koronavirus bəlası teatrımızın da yaradıcılıq ritmini pozdu. Amma biz öhdəmizə düşən missiyanı anladığımızdan, müasir texnoloji inkişafın imkanlarından bəhrələndik. Tərəfimizdən mütəmadi olaraq videokonfranslar keçirildi, maarifçilik işi aparıldı. “Evdə qal, sağlam ol”, “Evdə qal, tamaşa izlə” devizi ilə onlayn formatda həftənin 5 günündə 7 tamaşa təqdim etdik. İzləyici sayımız, rəy və təkliflər yetərincə çox oldu”, - deyə M.Həmidov qeyd edib.
O, yarımçıq qalmış tamaşaların onlayn məşqlərinin 52-ci mövsümdə davam edəcəyini qeyd edib. Həmçinin ilk dəfə olaraq Fuad Kazımov Ə.Haqverdiyevin “Kimdir müqəssir” əsərini kamera prinsipində, iki iştirakçı ilə hazırlayacaq.
Bölmənin digər xəbərləri
