SUMQAYIT ŞƏHƏR İCRA HAKİMİYYƏTİNİN BAŞÇISI VAQİF ƏLİYEVİN ÇIXIŞI
- Möhtərəm cənab Prezident!
Hörmətli qonaqlar!
Əziz sumqayıtlılar!
Bu gün hər bir sumqayıtlı, Sumqayıtın hər bir ailəsi sevinc içərisindədir. Çünki möhtərəm Prezidentimiz Sumqayıtda bizimlə birlikdədir və artıq bütün sumqayıtlıların çoxdan həsrətində olduqları hadisədən, ümummilli liderimiz Heydər Əliyevin möhtəşəm abidə kompleksinin açılışından sonra şəhərimiz üçün çox böyük əhəmiyyət kəsb edən buxar-qaz qurğusunun təməlinin qoyulması mərasimində iştirak edir.
Sumqayıt sənaye şəhəridir. Burada həmişə iri zavod və fabriklər işə salınmışdır. Azərbaycanımızın bütün sahələrdə inkişafının və tərəqqisinin əsasını qoyan ulu öndərimiz Heydər Əliyev Sumqayıta xüsusi qayğı göstərmiş və onun hərtərəfli inkişafını daim diqqət mərkəzində saxlamışdır. Sumqayıtla bağlı ümummilli liderimiz Heydər Əliyevin başa çatdıra bilmədiyi işlər indi Sizin tərəfinizdən uğurla davam etdirilir. Təməlini qoyduğumuz buxar-qaz qurğusu bu işlərin bariz nümunəsidir.
Məlum olduğu kimi, ümummilli liderimiz ölkəmizə rəhbərlik etdiyi müddətdə 16 dəfə Sumqayıta gəlmişdir. Dahi rəhbərimiz şəhərin ən çətin məqamlarında həmişə sumqayıtlılarla olmuşdur. Ulu öndərin sonuncu dəfə 2003-cü il aprelin 3-də Sumqayıta gəlişi də şəhərimizin inkişafına böyük təkan verdi. Onun sosial-iqtisadi və ictimai-siyasi tərəqqisini təmin etdi və ümumən şəhərdə ab-havanı dəyişdi. Qapıları bağlı qalmış zavod və fabriklər işə salındı, sahibkarlığın inkişafı üçün hərtərəfli əlverişli şərait yaradıldı, yeni, müasir avadanlıq və texnologiyalarla təchiz edilmiş müəssisələr açıldı, su, enerji və qaz təchizatı yaxşılaşdırıldı. Sakinlərin uzun illər ərzində diqqətdən kənarda qalan məişət problemləri aradan qaldırıldı, sumqayıtlıların gələcəyə olan inam hissi özlərinə qaytarıldı.
Respublikamızın digər regionları kimi, Sumqayıt da bu gün dinamik inkişafdadır. Ötən ilin yekunlarına görə, şəhər üzrə sənaye istehsalının həcmi 60 faiz artaraq, dövlətimizin müstəqillik illərində qazanılmış ən yüksək göstəriciyə, 1 trilyon manat həddinə çatmış və bu yüksək inkişaf sürəti cari ilin birinci yarısında da saxlanılmışdır. Son dövrlərdə şəhərdə müxtəlif sahələrdə 13 mindən yuxarı yeni iş yeri açılmışdır ki, bunların da yarıdan çoxu daimi iş yerləridir. Təkcə 2003-2004-cü illərdə Sumqayıt şəhərinə qoyulmuş xarici və daxili investisiyaların həcmi 115 milyon ABŞ dollarını ötmüşdür. Şəhərin müxtəlif yerlərində ucaldılan özəl yaşayış binaları, əhalidə digər sosial problemlərin həlli ilə yanaşı, bu gün aktual olan mənzillə təminatlarının da yaxşılaşdırılacağına inam yaradır. Hazırda şəhərimizdə 64 min kvadratmetr özəl mənzil sahəsi tikilməkdədir.
Park və xiyabanlar yenidən qurulmuş, abadlaşdırılmış, təzələri yaradılmış, fəvvarələr işə salınmışdır. Yaşayış massivlərində 50-dən çox uşaq-idman meydançaları yaradılmışdır. Şəhərin mədəni həyatında əsaslı irəliləyişlərə nail olunmuşdur.
Cənab Prezident, “Sumqayıt stansiyası” yaşayış massivində müasir tələblərə cavab verən 500 yerlik orta məktəb binasının tikilib istifadəyə verilməsi, əksər orta ümumtəhsil müəssisələrinin dam örtüklərinin və istilik sistemlərinin əsaslı təmir olunması, şəhərin abadlaşdırılmasına, yolların əsaslı təmirinə əlavə vəsait ayrılması, şəhid ailələri və Qarabağ müharibəsi əlilləri üçün yaşayış binalarının tikilməsi məhz Sizin gündəlik qayğınız və qəti tələbkarlığınızın nəticəsidir. Bu istiqamətdə işlər davam edir.
Bunu da xatırlatmağı vacib bilirəm ki, sumqayıtlıları uzun illər narahat edən çox ciddi bir problem möhtərəm Prezidentimizin göstərişi ilə bu il öz həllini tapacaqdır: məişət çirkab suları üçün indiyədək mövcud olmayan müasir təmizləyici qurğunun inşasına başlanacaqdır.
Şəhərimizdə bir neçə enerjitutumlu istehsalatların mövcudluğunu və onların gələcək inkişaf perspektivlərini nəzərə alsaq, bu gün təməli qoyulan buxar-qaz qurğusunun Sumqayıtın intensiv inkişafının təmin edilməsində vacib rol oynayacağını şərh etməyə ehtiyac qalmır. Yaxın gələcəkdə şəhərimizdə kimya, maşınqayırma və yüngül sənaye sahələrinin inkişafı ilə yanaşı, bir sıra yeni müəssisələrin tikilib istifadəyə verilməsi istiqamətində işlər aparılır. Un məmulatları istehsal edəcək “Bismak” müəssisəsi, Türkiyənin “Dizayn qrupu” firmasının plastik borular müəssisəsi, qənnadı məmulatları müəssisəsi, pivə istehsalı müəssisəsi, elektrik tənzimləyiciləri istehsalı müəssisəsi, plastik və alüminiumdan qapı və pəncərə istehsalı müəssisəsi, həlledicilər, boya və əlif istehsalı sahəsi yaxın zamanlarda istifadəyə veriləcəkdir.
Təkcə Sumqayıt Alüminium istehsal sahəsi ilə “Azərboru” ASC tam gücü ilə işə düşdükdən sonra onların gündəlik enerji tələbatı 280-300 Mvt olacaqdır. Bütün bunlar buxar-qaz qurğusunun Sumqayıt sənayesinin və sahibkarlığın inkişafı üçün nə dərəcədə böyük əhəmiyyət kəsb etdiyini göstərir. Cənab Prezident, Sumqayıt üçün zəruri olan bu obyektin Dövlət proqramına salınmasına görə sumqayıtlılar adından Sizə dərin minnətdarlığımızı bildiririk.
Hörmətli cənab Prezident!
Sumqayıt bu gün öz inkişafında yeni mərhələyə keçmiş, qısa müddətdə görkəmi büsbütün dəyişmiş, təmiz və abad bir şəhərə çevrilmişdir. Bu şəhərdə insanlar üçün rahat şərait yaradılmışdır. Sizin qayğınız sayəsində hər bir sumqayıtlı gələcəyə inamla baxır, müsbət dəyişiklikləri gündəlik həyatında hiss edir. Sizin diqqətiniz həmişə Sumqayıtın üzərindədir, qayğınızı daim hiss edirik. Bütün bunlara görə hər bir sumqayıtlı Sizi sevir, Sizə inanır və Sizinlə fəxr edir.
Bizim bütün nailiyyətlərimizin əsasını ulu öndərimiz Heydər Əliyevin həmişəyaşar ideyaları təşkil edir. Cənab Prezident, biz inanırıq ki, Heydər Əliyevin siyasi xəttini uğurla davam etdirməyiniz ölkəmizin möhkəmlənməsinə və qüdrətinin artmasına, xalqımızın rifah halının daha da yaxşılaşmasına, yeni nəslin dövlətimizə, xalqımıza məhəbbət ruhunda tərbiyə olunmasına xidmət edəcəkdir. Bütün bu işlərdə sumqayıtlıların, həmişəki kimi, Sizin ən yaxın köməkçiləriniz olacaqlarına əmin ola bilərsiniz!
Bölmənin digər xəbərləri
