“Sumqayıt” yoxlama oyununda “Zirə”ni məğlub edib
Bakı, 15 avqust, AZƏRTAC
2020-2021-ci il mövsümünün birinci oyunu üçün hazırlıqlarını davam etdirən “Sumqayıt” futbol klubu avqustun 14-də “Zirə” ilə yoxlama oyunu keçirib.
AZƏRTAC xəbər verir ki, “Kapital Bank Arena”da baş tutan görüşdə Ayxan Abbasovun yetirmələri 4:0 hesablı qələbə qazanıblar. Bölgə təmsilçisinin qollarını Rüfət Abdullazadə, Elvin Məmmədov, Tellur Mütəllimov və Əli Qurbani rəqib qapısından keçiriblər.
Qeyd edək ki, “Sumqayıt” Avropa Liqasının I təsnifat mərhələsində avqustun 27-də Makedoniyanın “Şkendiya” klubunu qəbul edəcək.
Xatırladaq ki, “Sumqayıt” bundan əvvəl yoxlama görüşlərində “Neftçi”yə (0:3), “Sabah”a (0:1), “Qəbələ”yə (1:2) uduzub. “Zirə” isə “Keşlə”yə (0:1) məğlub olub, “Qəbələ” ilə qolsuz bərabərliyə nail olub.
Bölmənin digər xəbərləri
