Sumqayıtda “Əbədi ömrün yüz ili” kitabının təqdimatı olub
Sumqayıt, 12 iyun, Ətrabə Rzayeva, AZƏRTAC
Sumqayıtda Ümummilli Lider Heydər Əliyevin anadan olmasının 100 illik yubileyi münasibətilə Azərbaycan Yazıçılar Birliyinin nəşr etdirdiyi “Əbədi ömrün yüz ili” kitabının təqdimatı keçirilib.
AZƏRTAC xəbər verir ki, tədbir Yeni Azərbaycan Partiyası (YAP) Sumqayıt şəhər təşkilatının inzibati binasında təşkil olunub.
Tədbirdə Yeni Azərbaycan Partiyasının İdarə Heyətinin üzvü, YAP Sumqayıt şəhər təşkilatının sədri Ramiz Hüseynov, Sumqayıt Şəhər İcra Hakimiyyəti başçısının birinci müavini Teymur Səmədov, Azərbaycan Yazıçılar Birliyinin sədri, Xalq yazıçısı Anar, YAP İdarə Heyətinin üzvü, filologiya elmləri doktoru Elnarə Akimova, Azərbaycan Yazıçılar Birliyinin katibi, Əməkdar incəsənət xadimi Elçin Hüseynbəyli, “Ədəbiyyat” qəzetinin baş redaktoru Azər Turan, Özbəkistanlı yazıçı, Əməkdar jurnalist Məmmədqul Həzrətqulov, şəhər ictimaiyyətinin nümayəndələri, tanınmış ziyalılar iştirak ediblər.
Tədbirdə Ulu Öndər Heydər Əliyevin və Azərbaycanın ərazi bütövlüyü uğrunda canını qurban vermiş şəhidlərin əziz xatirəsi bir dəqiqəlik sükutla yad edilib.
Çıxışlarda Ümummilli Liderin Azərbaycan xalqı və dövləti qarşısındakı tarixi xidmətindən, zəngin həyatı və çoxşaxəli fəaliyyətindən, eləcə də təqdim olunan kitabın əhəmiyyətindən danışılıb.
Natiqlər qeyd ediblər ki, tarix keçdikcə Heydər Əliyev dühasının əzəməti, onun şəxsiyyətinin böyüklüyü daha aydın dərk edilir. Əslində bu qeyri-adi şəxsiyyət hər zaman bizim əhatəmizdədir. Çünki Ulu Öndərin layiqli davamçısı Prezident İlham Əliyev Heydər Əliyevin şah əsəri olan müstəqil Azərbaycanı məhz onun miras qoyduğu dövlətçilik prinsipləri ilə idarə edir, onun imkan tapıb həyata keçirə bilmədiyi idealları reallığa çevirir. Bu misilsiz şəxsiyyətin xalqımız üçün etdiyi işlərin möhtəşəmliyini, tarixi dəyər və miqyasını əhatə etmək olduqca çətindir. Heydər Əliyevin miras qoyduğu sərvətlər içərisində onun zəngin nəzəri irsi xüsusi yer tutur. Bu irs bizim milli sərvətimizdir.
Özbəkistanlı yazıçı, Əməkdar jurnalist Məmmədqul Həzrətqulov çıxışında Özbəkistan və Azərbaycan ədəbiyyatları arasındakı bağlılıqdan söz açıb. Müasir dövrdə türk xalqları arasında mövcud olan mədəni əlaqələrin bu xalqların tarixi keçmişinə əsaslandığını bildirən natiq qeyd edib ki, Azərbaycan xalqının Ümummilli Lideri Heydər Əliyev bu məsələyə böyük önəm verib.
Çıxışlarda Ümummilli Lider Heydər Əliyevin Azərbaycanın inkişafında, müstəqilliyin möhkəmləndirilməsində əvəzsiz xidmətlərindən, ölkəmizdə ədəbiyyat sahəsinin inkişafına göstərilən dövlət qayğısından da danışılıb.
Diqqətə çatdırılıb ki, “Əbədi ömrün yüz ili” kitabına Heydər Əliyev haqqında tanınmış söz və bilim adamlarının bədii-publisistik məqalələri, esse və xatirələri daxildir. Azərbaycan Yazıçılar Birliyinin üzvü olan müəlliflərin əksəriyyəti bu böyük və müdrik insanı şəxsən tanıyıb, onunla yaxından təmasda olublar. Ona görə də bu kitab Heydər Əliyevi yaxından tanımaq, ölkəmiz qarşısındakı misilsiz xidmətlərini daha dərindən anlamaq üçün qiymətlidir və dəyərli mənbədir.
Bölmənin digər xəbərləri
