SUMQAYITIN MƏRKƏZİ PROSPEKTLƏRİNDƏN BİRİNƏ HEYDƏR ƏLİYEVİN ADI VERİLMİŞDİR

15.04.2004 [14:20]
Çap et
A⁺ A^-

Sumqayıtlılar xalqımızın ümummilli lideri, Prezident Heydər Əliyevin xatirəsini əbədiləşdirmişlər. Şəhərin mərkəzi prospektlərindən biri indən belə onun adını daşıyacaqdır. Bu qərar Sumqayıt Şəhər İcra Hakimiyyətinin başçısı yanında Şuranın geniş iclasında qəbul olunmuşdur. İclasda Milli Məclisin bu şəhərdən seçilmiş deputatları, şəhər bələdiyyəsinin, sənaye müəssisələrinin, təşkilatların, idarələrin rəhbərləri, habelə şəhər ictimaiyyətinin, elmi və yaradıcılıq birliklərinin, ağsaqqallar, Qarabağ müharibəsi veteranları şuralarının, şəhid ailələrinin, gənclərin nümayəndələri iştirak etmişlər.

İcra hakimiyyətinin başçısı Vaqif Əliyev iclasda çıxış edərək bildirdi ki, görkəmli şəxsiyyət, dünya miqyaslı siyasətçi, xalqımızın böyük oğlu, unudulmaz Prezident Heydər Əliyevin vəfatını bütün Azərbaycan xalqı və Sumqayıt sakinləri dərin hüzn və kədər hissi ilə qarşıladılar. Şəhərin ayrı-ayrı sakinlərinin, əmək kollektivlərinin Heydər Əliyevin adının əbədiləşdirilməsi barədə çoxsaylı müraciətləri qədirbilən sumqayıtlıların onun xatirəsini əziz tutduqlarını sübut edir. Axı, Heydər Əliyevin ölkəyə 34 illik rəhbərliyi Sumqayıtın 55 illik tarixinin yarısından çoxunu əhatə edir. Sumqayıtın keçmiş İttifaqın iqtisadiyyatına dərindən inteqrasiya etmiş iri sənaye mərkəzi kimi formalaşması, onun geniş mədəni, sosial, maarif obyektləri şəbəkəsinə malik bir şəhərə çevrilməsi məhz Heydər Əliyevin çox böyük əməyinin və sumqayıtlılara daimi diqqət və qayğısının nəticəsidir. Odur ki, Azərbaycan xalqının ümummilli liderinin xatirəsinin əbədiləşdirilməsi haqqında dövlət başçısı İlham Əliyevin Fərmanını sumqayıtlılar böyük ruh yüksəkliyi ilə qarşılamışlar.

İcra hakimiyyətinin başçısı iclas iştirakçılarını müraciətlərə baxmaqla məşğul olan xüsusi komissiyanın işinin nəticələri ilə tanış edərək bildirdi ki, müraciət edənlərin mütləq əksəriyyəti Dostluq küçəsinə Heydər Əliyev prospekti adının verilməsi barədə təklifi dəstəkləmişdir.

Mütəxəssislərin məlumatında şəhərin mərkəzi magistrallarından olan, 3,5 kilometrlik bu küçənin tam xarakteristikası verilmişdir. 17 yaşayış məhəlləsini, 3 mikrorayonu əhatə edən bu prospekt şəhərdəki “Heydər bağı”nın önündə başa çatır. Prospekt boyu tibb şəhərciyi, elmi tədqiqat institutu, iki mədəniyyət sarayı, bir tədris müəssisəsi, bir neçə bank, sosial-məişət obyektləri yerləşir. Eni bəzi yerlərdə 70 metrə çatan prospektdə fəvvarələri olan çoxlu gözəl bağça salınmışdır. Demək olar, bütün şəhəri əhatə edən ilk küçələrdən biri olan bu prospekt şəhərsalmanın normalarına uyğundur və onun inkişaf perspektivi ilə üzvi surətdə bağlıdır.

İclasda çıxış edənlər Heydər Əliyevin sumqayıtlılar qarşısındakı xidmətlərindən söhbət açmış və prospektin abadlaşdırılmasına dair bir sıra maraqlı təkliflər irəli sürmüşlər.

Elə həmin gün təntənəli şəraitdə Heydər Əliyev prospektindəki 23 nömrəli yaşayış binasına vurulmuş xatirə lövhəsinin açılışı olmuşdur.