SURİYA ERMƏNİLƏRİ TÜRKİYƏ BAYRAĞINDAKI QIRMIZI RƏNGƏ İDDİA EDİRLƏR
AZƏRTAC-ın xüsusi müxbiri Türkiyədə ingiliscə nəşr olunan “The Diplomatic Observer” jurnalına istinadla xəbər verir ki, son aylar Suriya erməniləri türklərə qarşı təbliğat kampaniyasını daha da gücləndirmiş, Anadoludakı bir çox şəhər, qəsəbə və kilsələrin qondarma “erməni icması”na məxsus olması barədə tələblər irəli sürməyə başlamışlar.
Hələb şəhərindəki erməni protestant, katolik və pravoslav kilsələrinin rəsmiləri Türkiyədəki erməni millətindən olan vətəndaşları qızışdırmağa çalışaraq iddia edirlər ki, jurnalist Qrant Dink məhz erməni kilsələrinin məscidlərə çevrildiyini iddia etdiyinə görə qətlə yetirilmişdir. Vahid Suriya Erməniləri Komitəsində birləşən hər üç kilsənin başçıları Dəməşqin onlara ayırdığı maliyyə yardımını türklər əleyhinə təbliğata xərcləyirlər.
Ermənilərin bu ölkədə dərc olunan gündəlik “Kantsasar” qəzeti isə Daşnaksutyun Partiyasının hazırladığı “Türkiyədəki erməni şəhərləri” atlasını dərc etmişdir. Urfa şəhərinin də ermənilərə məxsus olduğunu iddia edən atlas müəllifləri bildirirlər ki, “Baba Abrahamyan çeşməsi”nin adı dəyişdirilərək “Balıq gölü” qoyulmuş, Suriya ilə sərhəddəki qəsəbə və kəndlər əslində qədimdən ermənilərin olmuşdur.
Qəzetdə daha bir iyrənc iddia irəli sürülür ki, guya Türkiyənin dövlət bayrağındakı qırmızı rəng türklərin axıtdığı erməni qanıdır. Suriyanın hökumət rəsmilərinin bu cür sərsəm iddialara görə “Kantsasar” qəzetinə qarşı tədbir görəcəyi bildirilir.
Bölmənin digər xəbərləri
