“Şuşa, sevgilim” – Bir vədin gerçəkləşdiyi an Nizami Kino Mərkəzində yaşandı
Bakı, 8 avqust, AZƏRTAC
Avqustun 7-də Bakıda - Nizami Kino Mərkəzində unudulmaz bir axşam yaşandı. Səhnəyə çıxan “Şuşa, sevgilim” sənədli filminin məsləhətçisi Qivami Rəhimli tamaşaçılara illər öncə verilmiş bir vəddən danışdı – Şuşanın səsini, ruhunu, Azərbaycan muğamını bütün dünyaya çatdırmaq vədindən. Bu filmin yaranma hekayəsini bölüşən Qivami Rəhimli, Azərbaycan xalq musiqisinin vurğunu, muğamlarımızı məharətlə ifa edən amerikalı Cefri Verbokun bu yolda göstərdiyi fədakarlığı və sədaqəti xüsusi vurğuladı, eləcə də layihənin ərsəyə gəlməsində verdiyi dəstəyə görə Avropa Azərbaycan Cəmiyyətinə (TEAS) təşəkkürünü bildirdi.
Bu sətirləri yazan bp şirkətinin hökumətlə işlər üzrə baş müşaviri Qivami Rəhimli tədbirin keçirilməsi və təqdimatla bağlı məlumatı AZƏRTAC-la bölüşüb. O, “Şuşa, sevgilim”in bir sənət əsəri olmaqdan daha çox, Azərbaycan mədəniyyətinin beynəlxalq səviyyədə tanıdılması missiyasını daşıyan bir layihə olduğunu vurğulayıb. Bu film həm də Cefri Verbokun Ulu Öndər Heydər Əliyevə illər öncə verdiyi vədin yerinə yetirilməsinin simvoludur: “Azərbaycan muğamını və Qarabağın mədəni irsini dünyaya tanıtmaq, Şuşanı sənət vasitəsilə yaşatmaq. “Şuşa, sevgilim” məhz həmin sadiqliyin bədii ifadəsidir”.
Qivami Rəhimli çıxışında, həmçinin vurğulayıb ki, Heydər Əliyev Fondu və Fondun prezidenti Mehriban Əliyeva uzun illərdir muğam sənətinin qorunması və təbliği istiqamətində mühüm layihələr həyata keçirir. Beynəlxalq Muğam Mərkəzinin yaradılması, muğam festivallarının təşkili və bu sahəyə davamlı dəstək Azərbaycanın mədəni irsinin dünyaya tanıdılmasında əvəzsiz rol oynayıb.
O, xüsusilə xatırladıb ki, Heydər Əliyev Fondunun prezidenti Mehriban Əliyeva Vaşinqtonda olarkən Cefri Verbok ilə görüşüb və onun yaratdığı Amerika Muğam Cəmiyyətinin bu sahədə gördüyü işləri yüksək qiymətləndirib. Bu görüş Cefridə Azərbaycan muğamının beynəlxalq miqyasda tanıdılması istiqamətində əməkdaşlıq ruhunu daha da gücləndirib.
Təqdimat mərasimində iştirak edən muğamsevərlər Cefri Verbokun bələdçiliyi vasitəsilə Qarabağa, muğamın sehrinə və Azərbaycan mədəniyyətinin zənginliyinə səyahət ediblər.
Film Cefri Verbokun Azərbaycan muğamına dərin sevgisini, bu mədəni irsi dünyaya tanıtmaq üçün göstərdiyi əzmkarlığı, dostluq və yaddaş mövzularına sadiqliyini təsirli bir dildə təqdim edib. Ekranda canlanan Qarabağ mənzərələri, muğamın səsi və Şuşa nəfəsi tamaşaçıların qəlbinə toxunub və onları duyğulandırıb.
Gecənin sonunda səhnəyə Cefri Verbokun rəhbərlik etdiyi muğam triosu çıxaraq, “Qarabağ maralı” xalq mahnısını canlı ifa edib. Bu səmimi musiqi anı zalda xüsusi bir ovqat yaradaraq, gecəni unudulmaz xatirəyə çevirib.
Tədbir başa çatdıqdan sonra tamaşaçılar zalı tərk etməyə tələsməyiblər. Onlar Cefri Verboka yaxınlaşaraq onunla şəkil çəkdirib, müxtəlif mövzularda səmimi söhbətlər aparıb və filmin onlarda yaratdığı təəssüratları bölüşüblər.
“Şuşa, sevgilim” yalnız bir sənədli film deyil – bu, həm də bir dostluğun, bir vədin və bir mədəniyyət sevgisinin ekrandakı yaddaşıdır. Filmin növbəti təqdimatının vaxtilə muğamın didərgin düşdüyü bölgədə – Qarabağda keçirilməsi planlaşdırılır.
Bölmənin digər xəbərləri
