TANINMIŞ TÜRK MÜĞƏNNİSİ TARKAN AZERCELL ABUNƏÇİLƏRİ ÜÇÜN KONSERT VERƏCƏKDİR
Azercellin mətbuat xidmətindən AZƏRTAC-ın müxbirinə bildirmişlər ki, konsertə bilet satılmır. Bunun əvəzində abonentlər üçün aprelin 21-dən mayın 24-nə qədər “Respublika gününə həsr olunmuş konsert” adlı yeni hədiyyə kampaniyası keçirilir. Kampaniya adi lotereya formasında təşkil olunmuşdur. Lotereya “27 may Tofiq Bəhramov adına Respublika stadionunda Tarkan sizin üçün oxuyur” yazılı 50 000 manat dəyərində SimSim kartları və 100 000 manatlıq ödəmə kartlarından ibarətdir. Uduşlu kartlarda pozulan boyanın altında “Dəvətnamə” sözü yazılmışdır. Bu yazını tapan Azercell Telekom abonentləri konsertə buraxılmaq imkanı qazanacaqlar.
Abunəçilər, həmçinin aprelin 22-dən mayın 25-dək 6969 nömrəsinə “Tarkan” (Nokia telefonları üçün) və ya TarkanS (Siemens telefonları üçün) mətnli qısa mesajlar göndərə bilərlər. Bu zaman hər 50-ci iştirakçı konsertə dəvəti əks etdirən qısa mesaj alacaqdır. Konsertdə Azərbaycan estradasının ulduzu Zülfiyyə Xanbabayeva da çıxış edəcəkdir.
Bölmənin digər xəbərləri
