TANINMIŞ YAZIÇININ YUBİLEYİ
Azərbaycan Milli Elmlər Akademiyasının Nizami adına Ədəbiyyat Muzeyində tanınmış yazıçı, alim, pedaqoq Manaf Süleymanlının 90 illiyinə həsr olunmuş yubiley tədbiri keçirilmişdir.
Tədbiri muzeyin direktoru, filologiya elmləri namizədi İsrafil İsrafilov açaraq mərhum yazıçının həyat və yaradıcılığının bəzi məqamlarından, onun son dərəcə təvazökar, ziyalı keyfiyyətlərindən danışdı.
AMEA-nın həqiqi üzvü Fuad Qasımzadə, müxbir üzvü, Milli Məclisin deputatı Nizami Cəfərov, Səməd Vurğunun ev muzeyinin əməkdaşı Aybəniz Vəkilova, jurnalist Elmira Axundova və başqaları yubiley tədbirində çıxış edərək, Manaf Süleymanlını gözəl insan, şəhər həyatını yaxşı bilən səmimi yazıçı, qayğıkeş pedaqoq kimi səciyyələndirdilər, - onun yaradıcılığında neftçilərin həyatından söhbət açan və dünyanın bir çox dillərinə tərcümə edilən “Yerin sirri” romanının, “Eşitdiklərim, gördüklərim, oxuduqlarım” memuarının xüsusi yer tutduğunu vurğuladılar. Natiqlər Manaf Süleymanlının tərcüməçilik fəaliyyətindən geniş bəhs etdilər, yazıçı ilə bağlı xatirələrini danışdılar.
Axırda Səfurə xanım çıxış edərək qardaşının xatirəsinə göstərdikləri diqqət və ehtirama görə minnətdarlığını bildirdi.
Bölmənin digər xəbərləri
