Tankerlərdən tökülən yanacaq Tarhankut bölgəsinə çata bilər
Bakı, 9 yanvar, AZƏRTAC
Külək Kerç boğazında tankerlərdən tökülən mazutun yaxın gələcəkdə Krım sahili boyunca yayılmasına kömək edir, neft məhsulları Tarhankut burnuna çata bilər.
AZƏRTAC xəbər verir ki, bu barədə Dənizdə Xilasetmə Xidməti ilə əməkdaşlıq edən distant tədqiqat metodları üzrə mütəxəssis Sergey Staniçnı TASS-a məlumat verib.
“Biz onun yanvarın 6-7-də Yevpatoriyaya çatacağını proqnozlaşdırırdıq. Təəssüf ki, proqnoz özünü doğrultdu. Cənub küləyi indi də əsir və çirklənmə şimala doğru yayılaraq Tarhankut bölgəsinə çata bilər. Lakin daha ciddi tullantılar olmayacaq (Anapadakı kimi), tökülən mazutun böyük hissəsi orada (Kerç boğazı yaxınlığında qəzanın baş verdiyi ərazidə - TASS-ın qeydi) sahilə atılıb”, - deyə Staniçnı bildirib.
Tarhankut yarımadası və Tarhankut burnu Krım yarımadasının ən qərb nöqtəsidir. Krımın unikal ekosistemlərinin qorunduğu xüsusi mühafizə olunan təbiət ərazisi olan “Tarhankut” parkı var. Burun gözəl mənzərələri, o cümlədən “Başçılar Xiyabanı” sualtı muzeyini ziyarət etmək istəyən dalğıclar arasında məşhur olduğu üçün turizm məkanı sayılır. Bölgənin özəlliklərindən biri odur ki, yerli balıqçılar hələ də balıq - skumbriya və kefali tutarkən qədim yunan texnologiyalarından istifadə edirlər.
Alim qeyd edib ki, son günlər peyk görüntülərindən istifadə etməklə çirklənmə zonasının qeydə alınması çətinləşib, çünki mazut sızması dayanıb, neft məhsullarının əhəmiyyətli hissəsi sahilə atılıb, qalan hissəsi isə su və çökdüyü torpaqda həll olunur. Bununla belə, ayrı-ayrı ləkələr izlənilə bilir.
Bölmənin digər xəbərləri
