Oğuz Rayonu İcra Hakimiyyətindən
AZƏRTAC-ın müxbirinə bildirmişlər ki, hazırda rayonda taxıl biçini kampaniyası mütəşəkkil davam edir. Biçinə 63 ədəd taxılbiçən kombayn, 23 ədəd küləş presləyən və digər texnika cəlb edilmişdir. Rayon statistika idarəsindən verilən son məlumata görə, indiyədək 5430 hektar sahənin məhsulu biçilmiş, 9550 ton taxıl tədarük olunmuşdur. Hər hektardan orta məhsuldarlıq 17,6 sentner təşkil etmişdir. Məhsul tədarükündə rayonun Bucaq, Kərimli və Yaqublu kənd ərazi icra nümayəndəliklərinin təsərrüfatları daha fəallıq göstərirlər.
X X X
Qax Rayon İcra Hakimiyyətindən verilmiş məlumata görə isə, payızlıq taxıl əkilmiş 10800 hektar sahənin 6900 hektarında biçin artıq başa çatdırılmışdır. Hələlik hər hektardan orta hesabla 15-16 sentner məhsul əldə edilmişdir. Hazırda taxıl sahələrində 46 ədəd taxılbiçən kombayn, 20 ədəd küləş presləyən, habelə xeyli sayda maşın, traktor və digər texnika işləyir.
Fermerlər biçin kampaniyasını optimal müddətdə başa çatdırmaq üçün səylə çalışırlar.
