TBİLİSİ BEYNƏLXALQ HAVA LİMANININ AÇILIŞ MƏRASİMİNDƏ AZƏRBAYCAN PREZİDENTİ İLHAM ƏLİYEVİN NİTQİ
-Hörmətli cənab Prezident!Hörmətli cənab Baş nazir!
Əziz xanımlar və cənablar!
Mən sizin hamınızı, ilk növbədə, bütün Gürcüstan xalqını yeni aeroportun işə düşməsi ilə əlaqədar ürəkdən təbrik edirəm. Çox gözəl binadır, ən müasir səviyyədə tikilib və uzun illər Gürcüstana xidmət edəcəkdir.
Bu gün çox əlamətdar gündür. Bu gün çox mühüm addımlar atılıbdır. Deyə bilərəm ki, üç ölkə arasında əməkdaşlıq yeni mərhələyə qədəm qoyubdur. Bir müddət bundan əvvəl imzalanmış müqavilələr, xüsusilə, Bakı-Tbilisi-Qars dəmir yolunun çəkilişinə dair imzalanmış bütün sazişlər bizim əməkdaşlığımızı daha da möhkəmləndirir. Əminəm ki, bütövlükdə, gələcəkdə energetika sektorundan sonra nəqliyyat sektoru bizim bölgədə ən önəmli istiqamətlərdən biri olacaqdır. Energetika sektorunda əldə edilmiş uğurlar, həyata keçirdiyimiz nəhəng transmilli layihələr bir başlanğıc idi.
Gürcüstan və Azərbaycan yeni müstəqil ölkələrdir. Müstəqilliyimizin ilk illəri hər iki ölkə üçün çox çətin və ağır keçmişdir. Deyə bilərəm ki, bizim müstəqilliyimiz təhlükə qarşısında idi və biz çox böyük mübarizələr apararaq, bugünkü səviyyəyə gəlib çatmışıq. Bu gün isə inkişaf dövrüdür. Bu gün ölkələrimiz yeni inkişaf strategiyasını müəyyən edirlər. Bizim birliyimiz, birgə layihələrimiz və energetika sektorunda, xüsusilə, Bakı-Tbilisi-Ceyhan neft kəməri ilə başlanmış əməkdaşlığımız digər sahələrə də öz təsirini göstəribdir. Əgər 1994-cü ildə “Əsrin müqaviləsi” imzalanmasaydı və onun məntiqi nəticəsi olan Bakı-Tbilisi-Ceyhan neft kəməri tikilməsəydi, nə Bakı-Tbilisi-Ərzurum qaz kəməri, nə də Bakı-Tbilisi-Qars dəmir yolu reallığa çevrilərdi. Ancaq indi bütün bunlar gerçəklikdir, mümkün olmuşdur. Bu da onu göstərir ki, mümkün olmayan məsələ yoxdur. Əgər rəhbərlərin iradəsi varsa, xalqların rəhbərlərə dəstəyi varsa, istənilən məsələni həll etmək mümkündür. Biz də bu gün bu yoldayıq.
Bizim birliyimiz artır, Türkiyə-Azərbaycan-Gürcüstan qardaşlığı möhkəmlənir. Bizim xalqlarımız da qardaşlıq münasibətləri ilə bir-birinə çox bağlıdırlar. Bu gözəl layihələr isə bizi daha da sıx birləşdirir. İqtisadi sahədə artan əməkdaşlığımız iqtisadiyyatlarımızı da bir-birinə bağlayır, mənfəətlərimizi də bir-birindən asılı edir və bizim uğurlu gələcəyimiz də bir-birimizin uğurlarından asılıdır. Məhz buna görə bizim birliyimiz davam etməli, möhkəmlənməlidir. Əminəm ki, gələcəkdə yeni, böyük layihələr həyata keçiriləcəkdir.
Bu gün bu bölgədə, Cənubi Qafqazda başlanmış və artıq bütün regiona yayılan layihələr geniş mənada bütün qitəyə öz təsirini göstəribdir. Enerji təhlükəsizliyi məsələləri indi dünya siyasətinin gündəliyində duran bir nömrəli məsələdir. Azərbaycan, Gürcüstan və Türkiyə Avropanın enerji təhlükəsizliyinə çox dəyərli töhfələrini verir. Bu, birinci addımdır. Bakı-Tbilisi-Ərzurum qaz kəmərinin işə düşməsi və gələcəkdə fəaliyyəti Avropaya açılan ilk pəncərədir. Bütün bu layihələr enerji və nəqliyyat dəhlizini möhkəmləndirir. Əgər regionumuzun xəritəsinə baxsaq görərik ki, müxtəlif imkanlar var, müxtəlif dəhlizlər açıla bilər. Ancaq o dəhlizlər işləyir ki, dəhliz keçən ölkələr buna öz dəstəyini verir. Ərazidən keçən yollar əhəmiyyətli yollardır. Sabitlik var, inkişaf var. Sabitlik olan yerə investisiyalar da qoyulacaq, maraq da artacaq və beləliklə, bölgəmiz inkişaf edəcəkdir.
Biz hələ çox işləməliyik, ölkələrimizi möhkəmləndirməliyik. Biz, sadəcə olaraq, inkişafın hələ birinci mərhələsindəyik. Birinci mərhələni uğurla başa vurduq, öz müstəqilliyimizi sübut etdik, iqtisadi potensialımızı özümüz gücləndiririk. Gələcəkdə həm regionda, həm də daha geniş mənada Avropada gedən işlər bizim əməkdaşlığımızdan xeyli dərəcədə asılı olacaqdır. Azərbaycan çox təhlükəsiz və etibarlı enerji ehtiyatlarına sahib olan, onları təhlükəsiz yollarla dünya bazarlarına çatdıran ölkədir və bizim tərəfdaşlarımız da bu işlərə öz töhfələrini verirlər.
Bu gün nəqliyyat günüdür. Mən bunu belə adlandırardım. Eyni zamanda, çox tarixi gündür. Bakı-Tbilisi-Qars layihəsinə başlanması və Tbilisi beynəlxalq hava limanının işə düşməsi çox əlamətdar hadisələrdir. Ancaq bir məsələyə diqqət çəkmək istəyirəm ki, Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars layihələrini biz birlikdə etmişik, Tbilisi hava limanında isə Azərbaycan bir az yaddan çıxıbdır. Bu, Türkiyə-Gürcüstan layihəsidir. Əgər dəvət etsəydiniz, biz də burada iştirak edə bilərdik. Amma buna baxmayaraq, biz də bir dost kimi, qardaş kimi buna sevinirik. Əminəm ki, Gürcüstanın yeni açılan qapıları, yeni hava qapıları buraya çoxlu işlər gətirəcək, dostlar gələcək, əməkdaşlıq artacaq, investisiyalar gələcəkdir. Beləliklə, ölkəniz inkişaf edəcəkdir. Bir dost, qardaş kimi və Gürcüstanı sevən bir insan kimi mən bunu arzulayıram. Bu gözəl gündə bütün Gürcüstan xalqına xoşbəxtlik arzulayıram. Arzu edirəm ki, bütün arzularınıza çatasınız. Arzu edirəm ki, ölkənizdə sülh olsun, inkişaf, mehribanlıq olsun və xalqınız rahat, firavan yaşasın. Biz, sizin dostlarınız da buna baxaq, sevinək.
Sizi bir daha təbrik edirəm.
/Dövlətimizin başçısının nitqi böyük diqqətlə dinlənildi və alqışlarla qarşılandı/.
Bölmənin digər xəbərləri
