TBİLİSİDƏ AZƏRBAYCAN QADIN FOTOQRAFLARININ SƏRGİSİ KEÇİRİLMİŞDİR

27.05.2006 [11:57]
Çap et
A⁺ A^-

AZƏRTAC-ın xüsusi müxbiri xəbər verir ki, Tbilisidəki “Kopala” rəsm qalereyasında dörd azərbaycanlı qadın fotoqrafın əsərlərinin sərgisi keçirilmişdir. Sərgi Azərbaycan Mədəniyyət və Turizm Nazirliyinin, Fotoqraflar İttifaqının dəstəyi, ölkəmizin Gürcüstandakı səfirliyinin təşəbbüsü ilə təşkil olunmuşdur.

40 fotoşəklin nümayiş olunduğu sərgidən məqsəd gürcü ictimaiyyətini Azərbaycan qadını obrazı ilə tanış etməkdir.

Azərbaycanın Gürcüstandakı səfiri Namiq Əliyev gənc qadın fotoqraflarımızın əsərlərinin Azərbaycan qadınının həyat və fəaliyyəti haqqında geniş təəssürat yaratdığını bildirmişdir.

O, bu sərginin səfirliyin may ayında Tbilisidə təşkil etdiyi ikinci fotosərgi olduğunu xatırlatmışdır. Belə ki, mayın 10-da ümummilli liderimiz Heydər Əliyevin həyat və fəaliyyətindən bəhs edən geniş fotosərgi təşkil olunmuşdu.

Gürcüstanda akkreditə olunmuş diplomatik korpusun, Tbilisinin, Kvemo Kartli - Borçalı bölgəsinin nümayəndələri sərgini maraqla nəzərdən keçirmişlər.