TBİLİSİDƏ BEYNƏLXALQ NEFT, QAZ, ENERJİ, İNFRASTRUKTUR KONFRANSI VƏ SƏRGİSİ AÇILMIŞDIR
Konfransı Gürcüstanın Baş naziri Zurab Noğaideli açaraq, iştirakçılara uğur diləmişdir. Gürcüstanın energetika naziri Nika Gilauri öz ölkəsinin enerji ehtiyatları və hasilatı barədə məlumat vermişdir.
Qeyd edilmişdir ki, bu sərgi-konfrans hər il müvəffəqiyyətlə keçirilir, getdikcə də mütəxəssislərin böyük marağına səbəb olur. Azərbaycanın enerji ehtiyatlarının Gürcüstan ərazisi ilə dünya bazarına nəql olunması yönümündə GİOGİE-nın bütün imkanları səfərbərliyə aldığı, bir çox ölkələr arasında yeni strateji birlik yaratdığı xüsusi vurğulanmışdır.
Konfransda Gürcüstanda neft və qazın nəqlində servis şirkətləri üçün yeni imkanlar açıldığından, Azərbaycan, Türkiyə, Qazaxıstan və Rusiya ilə əməkdaşlıq, yerli neft ehtiyatı axtarışları, istehsalı və dənizdə hasilat sahəsində yeni imkanlar, müvafiq infrastrukturlara sərmayələr qoyulduğu, Gürcüstanın energetika bölməsinin bərpası və sair məsələlər barədə də ətraflı söhbət getmişdir.
Bildirildi ki, tədbirdən məqsəd neft-qaz sənayesində dövlətlə biznesmenlər arasında dialoq yaratmaq, boru kəmərləri və başqa nəqliyyat vasitələri ilə əlaqədar layihələr, investisiya imkanları, enerji hasilatı, müvafiq infrastrukturun bərpası ilə bağlı məsələlərin müzakirəsinə şərait yaratmaqdır.
Azərbaycan Sənaye və Enerji Nazirliyinin yanacaq və enerji əməliyyatları idarəsinin rəisi İdris Rzabəyov konfransda çıxışında qaldırılan məsələlərlə bağlı ölkəmizdə görülən işlər barədə ətraflı məlumat vermişdir.
Konfrans martın 17-də işini yekunlaşdıracaqdır.
