TƏBABƏT YENİLİKLƏRİ
DEHLİ . Insanlarin əksəriyyəti, o cümlədən bir çox diyetoloqlar tam əmindirlər ki, ərzağı çiy-çiy yemək bişmiş halda yeməkdən qat-qat faydalıdır. “Steytsmen” qəzeti yazır ki, bu fikri təkzib etmək olar.
Bişmiş yemək sağlamlıq üçün nəinki təhlükəsizdir, həm də onun tərkibində insan üçün zəruri olan külli miqdarda qidalı maddələr vardır. Yemək hazırlanarkən ərzaq məhsullarının tərkibindəki B və C vitaminləri, eləcə də minerallar azalsa da, bişirərkən qazanın ağzını açıq saxlamamaqla, suyu az tökməklə və sonradan onu boşaltmamaqla bu itkini xeyli azaltmaq mümkündür.
Bişmiş qidanın üstünlüyü onu çiy-çiy yeməkdən qat-qat çoxdur. Bişmiş ətin tərkibində B vitamini az olur, lakin alaçiy bişmiş ət insanın sağlamlığına ziyan vura, hətta ölümlə nəticələnə bilən xəstəliklərə səbəb ola bilər. Həm də, insan B vitaminini digər ərzaq məhsullarından və vitaminli preparatlardan da ala bilər.
Bişmiş yemək orqanizmin zülalları və karbohidratları asanlıqla mənimsəməsinə imkan verir.
Tərkibində proteinin miqdarı çox olan məhsullara, məsələn, ətə və paxlalı bitkilərə gəldikdə isə, onları, sadəcə olaraq, bişirmək, yaxud qızartmaq lazımdır. Mədə bu məhsulları çiy halda həzm edə bilmir.
Bişmiş yemək orqanizm üçün təhlükəsizdir, çünki yüksək temperaturda bişirilərkən təhlükəli bakteriyalar məhv olur. İsti tropik iqlim şəraiti olan ölkələr üçün bu, xüsusilə vacibdir.
X X X
PEKİN. Şəhər doğum evlərinin birində çinli qadının 5 uşağı olmuşdur.
Əvvəlcə qız, sonra onun iki qardaşı, bir neçə dəqiqədən sonra isə daha iki qız dünyaya gəlmişdir. Körpələrin hər birinin çəkisi 1 kq 420 qram ilə 1kq 820 qram arasındadır.
Ailə o qədər də imkanlı deyildir. Buna görə də Van Tsuyinin 5 uşaq doğacağı məlum olduqda ər-arvad qorxuya düşmüşdülər: onların bu qədər uşağı saxlamaq imkanı yoxdur.
Lakin bir müddətdən sonra məlum olmuşdur ki, narahatlığa əsas yoxdur. Süd məhsulları istehsal edən “Jli” sənaye qrupu körpələrin bütün qayğısını öz üzərinə götürmək qərarına gəlmişdir. Qrup doğumla bağlı bütün xərclərini ödəmiş, habelə 7 yaşına çatanadək uşaqlara pulsuz süd məhsulları verməyi və məktəbdə oxuyarkən 20 min yuan \2,4 min dollar\ ödəməyi öhdəsinə götürmüşdür.
X X X
SİDNEY. Adelaidadakı qadınlar və uşaqlar üçün hospitalın əməkdaşları bildirmişlər ki, Avstraliya tədqiqatçıları əqli geriliyə və epilepsiyaya səbəb olması güman edilən geni aşkara çıxarmışlar.
Tədqiqatçılar qrupunun rəhbəri doktor Cozef Heksin dediyinə görə, onlar dünyada ilk dəfə olaraq, hər iki xəstəliyi törədən geni tapmışlar. Alimlər bu kəşfi uşaq epilepsiyasının səbəbini aydınlaşdırmağa çalışan beynəlxalq tədqiqatçılar komandası ilə birlikdə işləyərkən etmişlər.
Doktor Heks bunu çox vacib kəşf adlandıraraq vurğulamışdır ki, hər iki xəstəliyin müalicəsi üçün dərmanlar hazırlamaqdan ötrü hələ çox işləmək lazımdır. O demişdir :”Biz bu xəstəliklərlə doğulmuş uşaqlara, təəssüf ki, hələ kömək edə bilmirik. Əminik ki, gələcəkdə onları bu kəşf əsasında müalicə etmək mümkün olacaqdır. Lakin hələlik biz bunu vəd edə bilmirik”.
X X X
LONDON. “İmperial kollec”in və Londondakı Hammersmit xəstəxanasının alimləri bildirmişlər ki, Britaniya tədqiqatçıları iştahanı stimullaşdıran insan hormonunu aşkar etmişlər.
Mütəxəssislərin bildirdiyinə görə, bu kəşf çox arıq, habelə həddindən artıq kök adamların müalicəsi üçün yeni metod hazırlanmasına yol açır. Kəşfin müəlliflərinin izahına görə, eksperimentlər göstərmişdir ki, qrelin hormonu qida qəbulunun tənzimlənməsində mühüm rol oynayır.
Bu hormonun səviyyəsi səhər yeməyindən əvvəl yüksək olur, sonra isə aşağı düşür ki, bu da hər dəfə qida qəbulundan sonra özünü xüsusilə büruzə verir. Qrelin hormonu vurulmuş könüllülər həmişəkindən üç dəfə çox yemişlər. İTAR-TASS xəbər verir ki, alimlər onkoloji xəstəliklərə tutulanların iştahasını açmaq üçün istifadəni kəşfin əməli surətdə tətbiqinin ilk mümkün sahəsi hesab edirlər.
Bölmənin digər xəbərləri
