Təhsil tələbə krediti almaq üçün 4083 nəfər müraciət edib
Bakı, 5 yanvar, AZƏRTAC
Təhsil tələbə krediti üçün müraciətlərin qəbulu davam edir.
Təhsil Nazirliyindən AZƏRTAC-a bildirilib ki, kredit almaq üçün 4083 tələbə müraciət edib. 929 nəfərin müraciəti kreditin rəsmiləşdirilməsi üçün müvəkkil banka göndərilib. Müraciətlərin nəticəsi olaraq 2021-ci il dekabrın 23-də 16 tələbə ilə kredit müqaviləsi bağlanıb və təhsil haqqı təhsil müəssisəsinə köçürülüb.
Ötən il noyabrın 25-dən bu günədək vətəndaşlar tərəfindən yaranmış suallara aydınlıq gətirilməsi üçün Çağrı Mərkəzinə 3137, vatsap üzərindən 2160, e-ttkf.edu.az dəstək bölməsinə 1767, portal.edu.az vasitəsilə Təhsil Nazirliyinə və nazirliyə məktub vasitəsilə (DMS) 115 olmaqla ümumilikdə 7179 sorğu daxil olub.
Qeyd edək ki, təhsil tələbə kreditinin ayrılmasında məqsəd təhsilin hamı, xüsusilə də əhalinin aztəminatlı təbəqələrindən olan şəxslər üçün əlçatanlığının təmin edilməsi, təhsildə bərabər imkanların yaradılması və təhsilin əhatə dairəsinin genişləndirilməsidır.
Bölmənin digər xəbərləri
