TƏHSİLƏ DÖVLƏT QAYĞISI ARTIR
Konfransdan əvvəl rayonun pedaqoji kollektivlərinin nümayəndələri Fəxri xiyabana gedərək Azərbaycan xalqının ümummilli lideri Heydər Əliyevin əziz xatirəsini ehtiramla yad etmişlər.
AZƏRTAC-ın müxbiri xəbər verir ki, Namiq Axundov adına 1 nömrəli orta məktəbin akt zalında keçirilən konfransda rayon təhsil şöbəsinin müdiri Müslüm Qəzənfərov “2003/2004-cü dərs ilinin yekunları və təhsilin müasir yanaşmalar əsasında inkişaf etdirilməsi sahəsində qarşıda duran vəzifələr” mövzusunda hesabat məruzəsi ilə çıxış etmişdir. Natiq demişdir ki, ulu rəhbərimiz Heydər Əliyevin siyasi kursunu bu gün uğurla davam etdirən Prezidentimiz İlham Əliyevin rəhbərliyi ilə Azərbaycanın təhsil sisteminə dövlət qayğısı artır. Prezident İlham Əliyevin yeni dərs ili ərəfəsində imzaladığı “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında” Fərmanı və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında” Sərəncamı milli təhsilimizin gələcək inkişafı istiqamətlərinin müəyyən edilməsində çox qiymətli və tarixi sənədlərdir. İl ərzində rayonda bir sıra uğurlar əldə olunmuş, aparılan islahatlar müsbət nəticə vermiş, təhsilin keyfiyyəti yüksəlmiş, məktəblərin maddi-texniki bazasının möhkəmlənməsi davam etdirilmiş, təhsil ocaqlarında əsaslı və cari təmir aparılmışdır. Fərəhli haldır ki, rayonun ümumtəhsil məktəblərinin məzunlarından 978 nəfəri ali məktəblərə qəbul olunmuş, 41 nəfər isə 600-dən yuxarı bal toplamışlar.
Məruzə ətrafında çıxışlar olmuş, təhsil, metodiki şuraların yeni üzvləri seçilmiş, “İl çərçivəsində” və “İlin şagirdi” müsabiqələrinin qaliblərinə, qabaqcıl müəllimlərə diplomlar və pul mükafatları verilmiş, konfransın qətnaməsi qəbul edilmişdir.
Konfransda Nəsimi Rayon İcra Hakimiyyətinin başçısı Tahir Quliyev çıxış edərək ümummilli liderimiz Heydər Əliyevin rəhbərliyi ilə Azərbaycanda islahatların aparılması, güclü təhsil sisteminin yaradılması, bu mütərəqqi ənənələri Azərbaycan Prezidenti İlham Əliyevin layiqincə davam etdirməsi, təlim-tərbiyənin keyfiyyətinin yüksəldilməsi, təhsil sahəsində məqsədyönlü işlərin görülməsi, rayonda bu sahədə əldə olunan nailiyyətlər və yol verilmiş nöqsanlar, qarşıda duran vəzifələr haqqında danışmış, yeni dərs ili və “Bilik günü” münasibətilə təhsil işçilərini təbrik etmişdir.
Tədbirdə Prezident İlham Əliyevə müraciət qəbul olunmuşdur.
Bölmənin digər xəbərləri
