Tələbə-könüllülər Formula-1 Avropa Qran-prisinə dəstək veriblər
Bakı, 23 iyun, AZƏRTAC
Bakıda keçirilmiş Formula-1 Avropa Qran-prisinin təşkilinə 42 ali təhsil müəssisəsi və 28 kolleci təmsil edən 3500-dən çox tələbə-könüllü cəlb olunub.
Təhsil Nazirliyindən AZƏRTAC-a bildiriblər ki, tələbə-könüllülər arasında Formula-1 Avropa Qran-prisi barədə təbliğat aparmaq məqsədilə bu qurumun “Bir” Tələbə-Könüllü Proqramı tərəfindən fevral-mart aylarında ali təhsil müəssisələrində keçirilmiş təqdimatlar zamanı 11 min tələbə məlumatlandırılıb. Nəticədə könüllü olmaq hüququ qazanmış tələbələr üç günlük yarış zamanı müxtəlif vəzifələrdə çalışıb, dünyanın ən mötəbər idman növlərindən olan Formula-1-in təşkilində beynəlxalq təcrübə qazanıb, oyunun qaydalarını öyrənib, xarici mütəxəssislərlə bir komandada işləyiblər. Yarış zamanı könüllülər mütəmadi olaraq turistlərlə, xarici mütəxəssislərlə ünsiyyətdə olub, onlara ölkəmizin tarixi, təbiəti, beynəlxalq tədbirlərin təşkilindəki təcrübəsi və görməli yerləri barədə məlumat veriblər. Tələbə-könüllülər komanda şəklində fəaliyyət göstərib, məşhur Formula-1 pilotları ilə yaxından tanışlıq imkanı qazanıblar.
Qeyd edək ki, martın 7-də Bakı Şəhər Halqası Əməliyyat Şirkəti və Təhsil Nazirliyinin “Bir” Tələbə-Könüllü Proqramı arasında könüllü fəaliyyət sahəsində əməkdaşlığın inkişafı və möhkəmləndirilməsi haqqında anlaşma memorandumu imzalanıb. Memorandumu imzalayan gənclər və idman naziri Azad Rəhimov və təhsil naziri Mikayıl Cabbarov Formula-1 Avropa Qran-prisi çərçivəsində könüllülük fəaliyyəti ilə əlaqədar birgə səy göstərməyin vacibliyini vurğulayıblar.
Tələbə-könüllülərin Formula-1 yarışına kömək göstərmələri üçün Təhsil Nazirliyi tərəfindən hər cür şərait yaradılıb, ali təhsil müəssisəsi və kolleclərdə yarış müddətində imtahanların vaxtı dəyişdirilib. Habelə tələbə-könüllülərin yarış həyəcanı ilə yaxından tanış olmaları və onlar arasında birliyin gücləndirilməsi məqsədilə “Bir” Tələbə-Könüllü Proqramı tərəfindən, Formula-1 təşkilat komitəsinin dəstəyi ilə aprel-may aylarında tələbələr arasında birinci kartinq çempionatı keçirilib.
Bölmənin digər xəbərləri
