TƏLƏBƏ QƏBULU ÜZRƏ DÖVLƏT KOMİSSİYASININ SƏDRİ BRİFİNQ KEÇİRMİŞDİR
AZƏRTAC xəbər verir ki, Tələbə Qəbulu üzrə Dövlət Komissiyasında (TQDK) kütləvi informasiya vasitələrinin nümayəndələri üçün brifinq keçirilmişdir.
TQDK-nın sədri Məleykə Abbaszadə 2008/2009-cu tədris ili üçün əsas (9 illik) təhsil bazasından orta ixtisas məktəblərinə və Bakı Yanğın-Texniki Məktəbinə keçirilmiş qəbul imtahanlarının nəticələrinin avqustun 22-də TQDK-nın saytında (www.tqdk.gov.az) yerləşdiriləcəyini bildirmişdir.
M.Abbaszadə ali məktəblərin boş qalan plan yerlərinə və 11 illik təhsil bazasından orta ixtisas təhsili müəssisələrinə müsabiqənin nəticələri barədə də məlumat vermişdir. Bildirilmişdir ki, ali məktəblərin boş qalan 1562 plan yerinə 2684 nəfər ərizə vermiş və onlardan 836 nəfəri tələbə adı qazanmışdır (Azərbaycan bölməsi üzrə 713, rus bölməsi üzrə 123 nəfər).
11 illik təhsil bazasından orta ixtisas məktəblərinə ayrılan 6386 plan yerinə 6178 nəfər qəbul olunmuşdur. Xüsusi qabiliyyət tələb olunan ixtisaslar istisna olmaqla, plan yerləri tamamilə dolmuşdur.
TQDK-nın sədri jurnalistləri maraqlandıran suallara da cavab vermişdir.
Bölmənin digər xəbərləri
