CƏMİYYƏT
TERRORİZMLƏ MÜBARİZƏYƏ DAİR FORUM İŞİNİ DAVAM ETDİRİR
Martın 27-də MDB Parlamentlərarası Assambleyasının və Avropa Şurası Parlament Assambleyasının təşəbbüsü ilə keçirilən “Terrorizmlə mübarizəyə dair Sankt-Peterburq parlamentlərarası forumu”nun ümumi iclası başlanmışdır.
Rusiya Federasiyası Dövlət Dumasının sədri, forumun təşkilat komitəsinin sədri Gennadi Seleznyov iclası açaraq, RF Prezidenti, MDB Dövlət Başçıları Şurasının sədri Vladimir Putinin forum iştirakçılarına təbrikini oxudu. Rusiyanın rəhbəri beynəlxalq terrorizmlə mübarizədə və bu qlobal bəlaya qarşı tədbirlər sisteminin hüquqi bazasının möhkəmləndirilməsində qanunvericilik orqanlarının rolunu xüsusi vurğulamış, foruma uğurlu iş arzulamışdır.
RF Federal Məclisi Federasiya Şurasının və MDB Parlamentlərarası Assambleya Şurasının sədri Sergey Mironovun, AŞPA-nın sədri, forumun təşkilat komitəsinin həmsədri Peter Şiderin, Avropa Parlamenti sədrinin müavini Renzo İmbeninin, ATƏT-in Parlament Assambleyasının sədri Adrian Severinin, Avropa Şurasının baş katibi Valter Şvimmerin, MDB-nin üzvü olan dövlətlərin Təhlükəsizlik Orqanları və Xüsusi Xidmət İdarələri Rəhbərləri Şurasının sədri, RF Federal Təhlükəsizlik Xidmətinin direktoru Nikolay Patruşevin, habelə MDB-nin üzvü olan ölkələrin parlament sədrlərinin çıxışları terrorizmlə mübarizə sahəsində parlament səviyyəsində əməkdaşlığın çərçivələrinin müəyyənləşdirilməsi, beynəlxalq hüquq normalarına əsaslanan qanunverici-hüquqi baza yaradılmasının zəruriliyi ilə bağlı idi.
Forumda səslənmiş bütün məruzələrdə nəzərə çarpdırılırdı ki, bütün dövlətlər, beynəlxalq təşkilatlar və parlamentlərarası strukturlar transmilli terrorizmlə və onun hər hansı təzahürləri ilə mübarizə sahəsində əməkdaşlığı möhkəmləndirməlidirlər və bu, ən səmərəli mübarizə üsuludur.
Milli Məclisin sədri Murtuz Ələsgərov məruzəsində diqqəti separatizm probleminə cəlb edərək bildirmişdir ki, Azərbaycan Dağlıq Qarabağ üstündə gedən münaqişədən artıq neçə illərdir əziyyət çəkir.
M.Ələsgərov vurğulamışdır ki, Azərbaycan terrorizmlə beynəlxalq-hüquqi mübarizə prosesində fəal iştirak edir və bu qlobal bəla ilə mübarizənin təsirliliyi beynəlxalq əməkdaşlığın imkanlarından səmərəli istifadə edilməsi ilə yanaşı, terrorizmə milli səviyyədə müqavimətin gücləndirilməsi nəticəsində təmin oluna bilər.
Forumda Milli Məclisin deputatı, Azərbaycan parlamentinin AŞPA-dakı nümayəndə heyətinin başçısı İlham Əliyev, habelə deputatlar Əli Abbasov, Eldar Qəhrəmanov və Cəmil Həsənli iştirak etmişlər.
X X X
Martın 27-də Tavriya sarayında Milli Məclisin sədri Murtuz Ələsgərov Türkiyə parlamentinin deputatı, Qara Dəniz İqtisadi Əməkdaşlıq Təşkilatı Parlament Assambleyasının /QİƏTPA/ vitse-prezidenti Nacin Çətinqayanı qəbul etmişdir.
Milli Məclisin sədri Azərbaycan və Türkiyə parlamentlərinin əməkdaşlığından, habelə iki dövlətin QİƏTPA çərçivəsində əməkdaşlığından razı qaldığını bildirmişdir. M.Ələsgərov Ermənistan-Azərbaycan münaqişəsinin dincliklə nizama salınması sahəsində danışıqlar prosesi barədə məlumat vermiş və bu məsələdə Azərbaycanı daim dəstəklədiyinə görə Türkiyə rəhbərliyinə təşəkkür etmişdir.
Nacin Çətinqaya görüşdən məmnunluq duyduğunu bildirərək, iki ölkənin parlament üzvləri arasında daha sıx əməkdaşlığın zəruri olduğunu vurğulamışdır.
Martın 28-də forum işini davam etdirəcək və yekun sənədi qəbul olunacaqdır.
Asya Hacızadə
AZƏRTAC-ın xüsusi müxbiri
Sankt-Peterburq