Tərtərdə elmi konfrans: “Firidun bəy Köçərli və Qarabağ ədəbi-mədəni mühiti”
Tərtər, 12 iyun, AZƏRTAC
Tərtər Rayon İcra Hakimiyyətinin və Azərbaycan Milli Elmlər Akademiyası (AMEA) Folklor İnstitutunun birgə təşkilatçılığı ilə ədəbiyyatşünas, yazıçı-publisist Firidun bəy Köçərlinin anadan olmasının 160 illik yubileyinə həsr olunmuş “Firidun bəy Köçərli və Qarabağ ədəbi-mədəni mühiti” mövzusunda Respublika Elmi Konfransı keçirilib.
AZƏRTAC-ın bölgə müxbiri xəbər verir ki, konfransda əvvəlcə Azərbaycanın Dövlət Himni səsləndirilib, Ümummilli Lider Heydər Əliyevin və torpaqlarımızın suverenliyi uğrunda canlarını qurban vermiş şəhidlərin ruhu bir dəqiqəlik sükutla yad edilib.
Konfransda çıxış edən Tərtər Rayon İcra Hakimiyyətinin başçısı Müstəqim Məmmədov bildirib ki, ömrünün 40 ilini millətinin maariflənməsi və tərəqqisi yolunda xərcləyən Firidun bəy Köçərli ədəbi fikir tariximizdə ən ali məqam sahibi kimi xatırlanır. Tərəqqipərvər elm və ədəbiyyat xadimləri sırasında xüsusi yer tutan şəxsiyyətlərdən olan Firidun bəy Əhməd ağa oğlu Köçərli 1863-cü il yanvarın 26-da Şuşada anadan olub. Əsli Cavanşir mahalının Köçərli kəndindən olan Firidun bəyin ulu babalarından Məhəmməd bəy Köçərli kəndindən Şuşaya köçmüş, burada yurd-yuva salmış, beləliklə, Şuşada Köçərli məhəlləsi yaranmışdır. Firidun bəyin dünyaya göz açdığı mühit əsl ziyalı mühiti olmuşdu.
Diqqətə çatdırılıb ki, Firidun bəy Köçərli Azərbaycan maarifçisi, pedaqoq, metodist, ədəbiyyatşünas, publisist kimi çox böyük xidmətlər göstərib. O, Azərbaycan ədəbiyyatının tarixi inkişaf yoluna dair qiymətli mənbə təşkil edən əsərlər yaratmış və çoxcəhətli zəngin fəaliyyəti ilə ictimai-mədəni fikrin təşəkkülünə mühüm töhfələr vermişdir. Ölkəmizdə təhsil sisteminin milli əsaslar üzərində qurulması prosesində onun maarifçi ziyalı kimi apardığı işlər böyük əhəmiyyətə malikdir. Məhz buna görə də Azərbaycan Prezidentinin 14 fevral 2013-cü il tarixli Sərəncamı ilə Azərbaycanın görkəmli ədəbiyyatşünas alimi, tanınmış maarifpərvər, ictimai xadim, publisist-yazıçı, tənqidçi və tərcüməçi Firidun bəy Əhməd ağa oğlu Köçərlinin anadan olmasının 150 illiyi respublikamızda geniş qeyd olunub.
Vurğulanıb ki, millət aşiqi, maarif fədaisi olan Firidun bəy Köçərlinin gənc nəslin təhsil almasında, maariflənməsində əvəzsiz xidmətləri olub. Qədirbilən xalqımız böyük mütəfəkkirin işıqlı əməllərini heç vaxt unutmayacaq.
Diqqətə çatdırılıb ki, bu gün maarifpərvər ziyalı Firidun bəy Köçərlinin böyüyüb boya-başa çatdığı Şuşa böyük inkişaf dövrünü yaşayır. Qısa bir zamanda Şuşa Qarabağımızın və bütövlükdə Azərbaycanımızın elm, mədəniyyət və təhsil mərkəzinə çevriləcək, əvvəlki şöhrətini özünə qaytaracaqdır. Şuşanın musiqi, mədəni və təhsil həyatı öz əvvəlki ahənginə qovuşacaqdır. Bu torpaqda yenidən Firidun bəy Köçərlilər, Üzeyir bəy Hacıbəylilər, Xurşidbanu Natəvanlar, Bülbüllər, Xan Şuşinskilər yetişəcəklər.
AMEA Folklor İnstitutunun direktoru akademik Muxtar İmanov çıxış edərək, konfransın məqsədindən və əhəmiyyətindən danışıb.
Sonra AMEA Folklor İnstitutunun şöbə müdirləri, filologiya elmləri doktorları Seyfəddin Rzasoy “Firidun bəy Köçərlinin bədii-estetik baxışları sistemində ədəbi mühit konsepti”, Ramazan Qafarov “Azərbaycan uşaq folklorunun toplanması, nəşri və tədqiqi tarixindən: “SMOMPK” toplusunun və Firidun bəy Köçərlinin rolu”, Leyla Məmmədova “Qarabağın qadın şairlərinin yaradıcılığı ədəbi-ictimai mühit konteksində”, filologiya üzrə fəlsəfə doktorları İlhamə Qəşəmova “Qarabağ ədəbi mühiti və aşıq yaradıcılığı”, Qalib Sayılov “Qarabağ aşıq mühiti: Aşıq Abbasqulu”, Elçin Abbasov “Qarabağ nağıllarının süjet özəllikləri və obrazlar sistemi” mövzularında çıxış ediblər.
Məruzə və çıxışlarda Firidun bəy Köçərlinin Azərbaycan milli ədəbiyyatı tarixindəki rolundan, onun maarifçilik ənənələrindən, əsərlərindən ətraflı söhbət açılıb.
Bölmənin digər xəbərləri
