TƏRTƏRLİLƏR SABAHA İNAMLA BAXIRLAR
AZƏRTAC-ın müxbiri xəbər verir ki, Tərtər Rayon İcra Hakimiyyətində Azərbaycan Prezidenti İlham Əliyevin sədrliyi ilə keçirilən Nazirlər Kabinetinin 2007-ci ilin birinci yarısında sosial-iqtisadi inkişafın yekunlarına və qarşıda duran vəzifələrə həsr olunmuş iclasında dövlət başçısının nitqindən irəli gələn vəzifələrlə bağlı hesabat yığıncağı keçirilmişdir.
Yığıncaqda hesabat məruzəsi ilə çıxış edən rayon icra hakimiyyətinin başçısı Vidadi İsayev ölkəmizdə həyata keçirilən islahatların, proqramların, layihələrin uğurlu nəticələrindən, qazanılmış nailiyyətlərdən danışmış, respublikamızın 2007-ci ilin birinci yarısında iqtisadi inkişaf üzrə dünya dövlətləri arasında liderliyini saxladığını diqqətə çatdırmış, ulu öndər Heydər Əliyevin müəyyənləşdirdiyi inkişaf strategiyasının Prezident İlham Əliyev tərəfindən uğurla davam etdirildiyini vurğulamışdır.
Qeyd olunmuşdur ki, regionların sosial-iqtisadi inkişafı Dövlət Proqramı Tərtər rayonunda da uğurla həyata keçirilir, yeni istehsal sahələri yaradılır, geniş tikinti, abadlıq, quruculuq işləri aparılır, sənayenin, kənd təsərrüfatının ayrı-ayrı sahələrində uğurlu nəticələr qazanılır.
2007-ci ilin birinci yarısında rayonda makroiqtisadi göstəricilər xeyli yüksəlmiş, ümumi məhsul istehsalı 23,7 faiz artaraq 17890,6 min manata, sənaye məhsulu istehsalı 2 dəfə artaraq 850,3 min manata, qeyri-dövlət sektorunda 4,6 dəfə artaraq 373 min manata çatmışdır. Birinci yarım ildə əsas kapitala yönələn investisiya 3,6 dəfə artmış və 950,6 min manat təşkil etmişdir. Ötən ilin müvafiq dövrünə nisbətən kənd təsərrüfatı məhsulları istehsalı 10 faiz artaraq 9146,4 min manatlıq olmuşdur. 2007-ci ilin birinci yarısında ötən ilin müvafiq dövrünə nisbətən yük daşıması 13,2 faiz, poçt və rabitə xidmətlərinin həcmi 15,6 faiz, pərakəndə əmtəə dövriyyəsi 36,1 faiz, əhaliyə göstərilən pullu xidmətlər 32,4 faiz artmışdır.
Azərbaycan Respublikası Prezidentinin 2006-cı il 24 mart tarixli Sərəncamına uyğun olaraq 10 ədəd subartezian quyusu qazılıb istifadəyə verilmişdir. 24,1 kilometr uzunluğunda təsərrüfatlararası arxlar, 32,500 kubmetr beton kanallar lildən təmizlənmiş, 18 hidrotexniki qurğu təmir edilərək işlək vəziyyətə gətirilmişdir.
Hesabat dövründə 15014 ton taxıl, 283 ton paxlalılar, 1853 ton kartof, 4785 ton tərəvəz, 1153 ton meyvə istehsal olunmuşdur.
Şəhid ailələri və Qarabağ müharibəsi əlilləri üçün 16 mənzilli yaşayış binası tikilib istifadəyə verilmiş, şəhərin küçə və xiyabanlarında, yol kənarlarında 90 mindən çox ağac, 10 min ədəddən çox gül kolları əkilmişdir.
Rayon maliyyə şöbəsinin müdiri Zahid Təhməzov, təhsil şöbəsinin müdiri Aydın Qarayev, paylayıcı elektrik şəbəkəsinin müdiri Rza Səmədov, əmək və əhalinin sosial müdafiə işi mərkəzinin direktoru Abbas Cavadov çıxış edərək, görülən işlərdən və qarşıda duran vəzifələrdən danışmışlar.
Yığıncaqda Prezidentin İcra Aparatının regional idarəetmə və yerli özünüidarəetmə orqanları ilə iş şöbəsinin məsul işçisi Niyaz Əliyev, Milli Məclisin deputatı Aynur Quliyeva iştirak və çıxış etmişlər.
Bölmənin digər xəbərləri
