TƏSƏRRÜFATDA DAVARLARIN SAYI 500-Ə ÇATMIŞDIR
Laçın rayon əmək və məşqulluq mərkəzinin Ağcabədi rayonundakı Taxtakörpü qəsəbəsində məskunlaşmış məcburi köçkünlər üçün yaratdığı heyvandarlıq təsərrüfatında davarların sayı son üç ildə təqribən üç dəfə artaraq 500 başa çatmışdır. Qaçqınların və məcburi köçkünlərin problemlərinin həlli üzrə Dövlət proqramı çərçivəsində yaradılan bu təsərrüfatda indi 15 nəfər heyvandar çalışır.
Mərkəzin baş mütəxəssisi Səfiqulu Quliyev AZƏRTAC-a bildirmişdir ki, təsərrüfatın yaradılması üçün götürülmüş kreditin 20 milyon manatı burada istehsal olunmuş ət və yun satışından əldə edilmiş vəsait hesabına ödənilmişdir. Heyvandarların orta aylıq əmək haqqı 100 min manatdan 200 min manata çatmışdır. Təsərrüfat üçün 300 hektara yaxın otlaq sahəsi ayrılmışdır. Yoncalıqları suvarmaq üçün Kür çayından buraya nasoslarla su vurulur. Bir sözlə, təsərrüfatı gücləndirmək üçün heyvandarlara hər cür şərait yaradılmışdır.
Bölmənin digər xəbərləri
