TEZLİKLƏ DAXİLİ BAZAR YERLİ MƏHSULLARLA TAM TƏMİN EDİLƏCƏKDİR
İqtisadi inkişaf naziri Fərhad Əliyev AZƏRTAC-ın müxbirinə demişdir ki, bu yaxınlarda Gəncədə və Bakıda keçirilən sərgilər də yerli malların satışında heç bir çətinliyin olmadığını göstərdi. Lakin bir müddətdən sonra istehsalın həcminin artması ilə əlaqədar satışda problem yarana bilər. Məsələ burasındadır ki, ölkədə biznes mühiti yaxşılaşdıqca, sahibkarlığın inkişafına münbit şərait yarandıqca istehsalın həcmi də artacaqdır. Məsələn, bir neçə il bundan əvvəl quşçuluq sahəsində ölkə tamamilə idxaldan asılı idisə, indi xaricdən Azərbaycana çox az həcmdə (təxminən 20 faiz) quş əti və yumurta gətirilir. Təkcə bu il ölkədə üç yeni quşçuluq fabriki fəaliyyətə başlamışdır. Mövcud müəssisələr fəaliyyətlərini durmadan genişləndirir. Artıq bu müəssisələrdə kəsim müddəti də azaldılmış, 43 gündən 30-35 günə endirilmişdir. Bu da hər ay bazara min tonlarla toyuq əti çıxarılması deməkdir. Deməli, biz tezliklə daxili bazarı tam təmin edə biləcəyik və artıq ixrac barədə düşünməliyik. Bundan ötrü isə həm standartları yüksəltməli, həm də istehsal olunan məhsulu beynəlxalq tələblərə uyğunlaşdırmalıyıq.
Bölmənin digər xəbərləri
