Bakı, 28 noyabr, AZƏRTAC

İnnovasiya və Rəqəmsal İnkişaf Agentliyinin (İRİA) binasında “TikTok Startup Academy” proqramının yekun tədbiri keçirilir.

AZƏRTAC xəbər verir ki, tədbirin açılışında İnnovasiya və Rəqəmsal İnkişaf Agentliyinin innovasiya üzrə rəhbəri İqor Ovçarenko Azərbaycan uğurla inkişaf edən startap ekosistemindən danışıb.

İqor Ovçarenko bildirib ki, bu il oktyabrın 30-da elan olunan proqrama müraciət onlayn formada həyata keçirilib. Startapların minimum işlək məhsul (MVP) səviyyəsində olması və qlobal bazara çıxış üçün strateji plana sahib olması əsas meyarlar olaraq qeyd olunub. Bu meyarlara cavab verən 16 startap seçim mərhələsindən keçərək finala vəsiqə qazanıb.

“TikTok Startup Academy” proqramı Azərbaycandan və Özbəkistandan olan startaplara dəstək vermək, onları “TikTok” sosial şəbəkəsi vasitəsilə rəqəmsal mənzərədə inkişaf üçün gücləndirmək məqsədi daşıyır. Proqram iştirakçılara marketinq strategiyaları ilə bağlı ekspert məsləhətlərindən faydalanmaqla yanaşı, məzmun yaratmaq üçün yeni və effektiv yollardan istifadəni də təşviq edir. İRİA ilə bu əməkdaşlıq qlobal brend olan “TikTok”un Azərbaycanda startapları dəstəkləməyə və onların “TikTok” platformasında uğurlarına töhfə verməyə sadiqliyini nümayiş etdirir.

Tədbirdə çıxış edən “Tiktok”un Mərkəzi Asiya üzrə missiyasının rəhbəri Yuliya Kuşnir iştirakçılara “TikTok Startup Academy”də startapları inkişaf etdirmək istiqamətlərindən bəhs edib.

Yuliya Kuşnir bildirib ki, İnnovasiya və Rəqəmsal İnkişaf Agentliyi (İRİA) “TikTok” ilə birgə təlim proqramına - “TikTok Startup Academy”ə seçimlərin birinci mərhələsi Azərbaycanda və Özbəkistanda uğurla yekunlaşıb. Təlim proqramının ikinci mərhələsində bu gün tədbirdə “TikTok”, İRİA nümayəndələri, Azərbaycan və Özbəkistandan hər birində olan 16 startap, blogerlər iştirak edirlər. Bu mərhələdə “TikTok Startup Academy”də seçilmiş startaplar “TikTok” platforması üçün marketinq bacarıqlarını təkmilləşdirən və ingilis dilində keçiriləcək vörkşoplarda iştirak edəcəklər. Ən uğurlu startapların hər biri “TikTok” platformasındakı marketinq investisiyası üçün 2000 ABŞ dolları məbləğində mükafat əldə edəcək.

Daha sonra çıxış edən Özbəkistanın rəqəmsal texnologiyalar Nazirliyinin Rəqəmsal İqtisadiyyatın İnkişafı İdarəsinin baş mütəxəssisi Elyor Maksudov Azərbaycan və Özbəkistan arasında mövcud əlaqələrin inkişafını vurğulayıb.

“Biz ölkəmizdə startap ekosisteminin və İT sənayesinin inkişafına cavabdehik. Bugünkü tədbir “Startup Academy TikTok” startaplar üçün unikal platformadır. Hesab edirəm ki, bu, iki respublikanın - Özbəkistan və Azərbaycanın startapları arasında əlaqələrin inkişafına imkan yaradacaq. Belə görüşlər şəbəkələşmək, yeni əlaqələr qurmaq və Özbəkistan və Azərbaycan startapları arasında əməkdaşlığın inkişafı baxımından yaxşı fürsətdir. Bu gün Bakıda keçiriləcək bu tədbirdə fintech-dən maşın öyrənməsinə və süni intellektədək müxtəlif sahələri əhatə edən Özbəkistandan 16 startap iştirak edir. Düşünürəm ki, bu təhsil proqramı bütün iştirakçılar üçün çox maraqlı və faydalı olacaq”, - deyə Elyor Maksudov əlavə edib.

Elyor Maksudov bildirib ki, bugünkü tədbir Özbəkistan və Azərbaycanın rəqəmsal texnologiyalar sahəsində mövcud sıx əməkdaşlığına dəstək olacaq.

Tədbir çərçivəsində “TikTok” platformasında biznesin idarə olunması barədə seminarların keçirilməsi nəzərdə tutulub.

Qeyd olunub ki, qlobal brend Azərbaycandan olan startaplara dəstək verir və onlara “TikTok” sosial şəbəkəsi vasitəsilə biznesi inkişaf etdirmək vərdişlərini öyrədir. Startaplar marketinq strategiyası üzrə ekspert məsləhətləri alır, məzmun yaratmaq və təşviq etmək üçün yeni üsullar haqqında məlumat əldə edirlər.