ELM VƏ TƏHSİL
TOVUZÇAY QƏBİRİSTANINDA TƏDQİQAT APARILIR
Azərbaycan Milli Elmlər Akademiyasının Arxeologiya və Etnoqrafiya İnstitutu Bakı-Tbilisi-Ceyhan əsas ixrac neft kəmərinin keçəcəyi Tovuz rayonunun ərazisindəki Tovuzçay qəbiristanında çöl tədqiqat işləri aparır.
Institutun şöbə müdiri Qoşqar Qoşqarlı AZƏRTAC-ın müxbirinə bildirmişdir ki, eramızdan əvvəl II minilliyin sonu - I minilliyin əvvəlinə aid olan bu qəbiristanda tədqiqatlar zamanı 30-a qədər qəbir açılmış, külli miqdarda maddi mədəniyyət nümunələri, o cümlədən bəzək əşyaları, nizə ucları, xəncərlər və s. aşkar olunmuşdur. Tapılmış maddi mədəniyyət nümunələri geniş tədqiq ediləcəkdir.