DÜNYA
“Toyota” 2022-ci maliyyə ilində rekord miqdarda avtomobil istehsal edib və satıb
![“Toyota” 2022-ci maliyyə ilində rekord miqdarda avtomobil istehsal edib və satıb](/files/2023/1/1200x630/16826054872575329045_1200x630.jpg)
Bakı, 27 aprel, AZƏRTAC
“Toyota” konserni və onun törəmə kompaniyaları olan “Daihatsu” və “Hino” 2022-ci maliyyə ilində (2022-ci il aprelin 1-dən 2023-cü il martın 31-dək) rekord sayda avtomobil istehsal edib və satıb.
AZƏRTAC xəbər verir ki, bu barədə avtomobil konserninin statistik məlumatlarında deyilir.
Məlumata görə, ötən maliyyə ilində “Toyota” 10,73 milyon avtomobil istehsal edib və bütün dünya üzrə 10,56 milyon avtomobil satıb. İl ərzində bu göstəricilər müvafiq olaraq 6,6 və 1,7 faiz artaraq konsernin tarixində rekord səviyyəyə çatıb.
Yaponiyanın avtomobil istehsalçısı artıq ardıcıl olaraq üçüncü ildir ki, satış göstəricilərinə görə əsas rəqibi “Volkswagen” konsernini qabaqlayır. Almaniya konserni 2022-ci ilin 12 ayı ərzində cəmi 8,26 milyon avtomobil satmağa müvəffəq olub
Qeyd edək ki, “Toyota” və “Volkswagen” son illər avtomobil satışlarında liderlik uğrunda mübarizə aparır. Yaponiya konserni dörd illik fasilədən sonra 2020-ci ildə bu göstərici üzrə liderliyi özünə qaytarıb və həmin vaxtdan başlayaraq rəqiblər arasında satış fərqi artmaqda davam edir.