Trampın tarifləri Cənubi Afrikada 100 minə yaxın iş yerini təhlükə altına qoyur
Bakı, 16 iyul, AZƏRTAC
Cənubi Afrika Mərkəzi Bankının rəhbəri Lesetya Kqanyaqonun sözlərinə görə, ABŞ Prezidenti Donald Trampın Cənubi Afrikaya tətbiq etdiyi tariflər 100 minə yaxın iş yerinin itirilməsinə səbəb ola bilər ki, bu da ən çox kənd təsərrüfatı və avtomobil sektorunda baş verə bilər.
AZƏRTAC xarici mətbuata istinadla xəbər verir ki, bankir Afrikanın ən böyük iqtisadiyyatının avqustun 1-dən tətbiq ediləcək 30 faizlik tarifin təsirini konkret sənaye sahələrində ciddi ziyanla hiss edəcəyini qeyd edib.
O əlavə edib: “Kənd təsərrüfatı üçün nəticələr olduqca dağıdıcı ola bilər, çünki aqrar sektorda bir çox aşağı ixtisaslı işçilər çalışır və bu halda söhbət sitrus meyvələri, süfrə üzümləri və şərablardan gedir”.
Bankın rəhbəri Tramp administrasiyasının aprel ayında avtomobil idxalına tariflər tətbiq etməsindən sonra Cənubi Afrikadan ABŞ-a avtomobil ixracının 80 faizdən çox azaldığını göstərən statistikanın ciddi narahatlıq doğurduğunu bildirib. O qeyd edib: “Alternativ tədbirlər tapmasaq, 100 min nəfərə yaxın işçi iş yerini itirə bilər, bu, həqiqətən də qarşılaşdığımız çətin bir vəziyyətdir”.
Cənubi Afrika artıq bu ilin birinci rübündə rəsmi rəqəmlərlə 32,9 faiz və geniş kontekstdə 43,1 faiz olmaqla dünyanın ən yüksək işsizlik səviyyəsindən birinə sahibdir.
Təsərrüfat qrupları, həmçinin sitrus, makadamiya qoz-fındıqları, üzüm, şərab, meyvə şirələri və dəvəquşu dərisi istehsalçılarına mənfi təsirlər barədə xəbərdarlıq ediblər. Təkcə sitrus sektorunda tariflər 35 minə yaxın iş yerini riskə atıb və ABŞ-a ixracata çox güvənən Qərbi Keypdəki Sitrusdal kimi şəhərlər boşalmaq təhlükəsi ilə üzləşib.
Bölmənin digər xəbərləri
