“Türk marafonu 2020” məqalə müsabiqəsinin qalibləri müəyyənləşib
Bakı, 20 iyul, AZƏRTAC
“Türkdilli vikimediyaçılar” istifadəçi qrupu tərəfindən təşkil olunan “Türk marafonu 2020” məqalə müsabiqəsi sona çatıb və qaliblər müəyyənləşib.
Bu barədə AZƏRTAC-a müsabiqənin Azərbaycan dili bölməsindəki təşkilatçısı Eldar Əzimov məlumat verib. O deyib: “Müsabiqənin nəticələrinə görə, AMEA Mərkəzi Elmi Kitabxanasının bölmə müdiri Qulamhüseyn Məmmədov I, Fəqan Orucov II və Namik Mantaşov III yerə layiq görülüblər. Qaliblər 250, 150 və 100 AZN dəyərində hədiyyə kartları qazanıblar. Müsabiqə ərzində türkdilli ölkələr içərisində ən çox məqalə Azərbaycan dilindəki “Vikipediya”da yaradılıb. Ümumilikdə ay ərzində 461 Azərbaycan, 369 türk, 200 başqır, 330 saha, 89 özbək, 51 tuva və 12 qazax dilində məqalə yaradılıb. Ümid edirik ki, qaliblər bundan sonra da “Vikipediya”nın inkişafında əvəzedilməz xidmət göstərəcəklər”.
Qeyd edək ki, müsabiqənin Azərbaycan dili bölməsindəki təşkilatçıları doğma dilimizdə “Vikipediya” idarəçiləri Eldar Əzimov və Elgün Atalıyevdir.
Bölmənin digər xəbərləri
