Türkiyə vətəndaşlarının Livandan təxliyəsi üçün planlar hazırlanır
Ankara, 26 sentyabr, AZƏRTAC
Türkiyənin Milli Müdafiə Nazirliyi Yaxın Şərqdə növbəti gərginlik fonunda öz vətəndaşlarının Livandan mümkün təxliyəsi üçün plan hazırlayır.
Bu barədə AZƏRTAC Türkiyənin Milli Müdafiə Nazirliyinin mətbuat xidmətinə istinadla xəbər verir.
Nazirlik qeyd edib ki, Türkiyə vətəndaşlarının münaqişə zonasından çıxarılması planları Türkiyə Xarici İşlər Nazirliyi ilə əlaqələndirilir: “Livandan təhlükəsiz təxliyənin ilkin planlaşdırması və hazırlıq işləri davam edir. Bunun üçün bütün zəruri imkanlar mövcuddur”.
Müdafiə Nazirliyində vurğulayıblar ki, Ankara Beyruta humanitar yardım olan yük göndərib və Livanda baş verənləri diqqətlə izləyir.
Türkiyə Hərbi Hava Qüvvələrinin hərbi-nəqliyyat təyyarəsi bir gün öncə Livana 30 ton humanitar yük, o cümlədən tibbi ləvazimat çatdırıb.
Yaxın Şərq ölkəsinə yardım Prezident Rəcəb Tayyib Ərdoğanın tapşırığı əsasında göndərilib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
