TÜRKİYƏDƏ İQTİDAR PARTİYASI KONSTİTUSİYA MƏHKƏMƏSİNDƏ MÜDAFİƏ TƏRƏFİ QİSMİNDƏ ÇIXIŞ ETMİŞDİR
AZƏRTAC-ın xüsusi müxbiri xəbər verir ki, respublika prokuroru Əbdürrəhman Yalçınkaya tərəfindən Konstitusiya Məhkəməsində əleyhinə bağlanılma iddiası qaldırılmış Türkiyənin hakim Ədalət və İnkişaf Partiyası (AKP) iyulun 3-də məhkəmədə müdafiə tərəfi qismində çıxış etmişdir.
Müdafiə çıxışını Baş nazirin müavini Cəmil Çiçək və AKP-nin parlamentdəki qrupunun sədr müavini Bəkir Bozdağ etmişlər. Bundan iki gün əvvəl isə respublika prokuroru Əbdürrəhman Yalçınkaya məhkəmədə şifahi ittihamını təqdim etmişdi. İttihamnaməyə AKP sədrinin müavini Dengir Mir Məhmət Fıratın “Atatürkün inqilabları cəmiyyətdə travma yaratdı” sözlərini də əlavə edən prokuror bldirmişdir ki, sözügedən siyasi partiya mütləq bağlanılmalıdır.
Müdafiə tərəfinin çıxışından sonra Konstitusiya Məhkəməsinin yeni bir hesabat hazırlayacağı bidirilir. Bu prosesin davam edəcəyi müddətdə respublika prokuroru və AKP yeni dəlillərini məhkəməyə təqdim edə biləcəklər. Hesabat hazır olduqdan sonra Konstitusiya Məhkəməsinin 11 üzvünə paylanılacaq və məhkəmənin sədri Haşim Kılıc iclas gününü təyin edəcəkdir.
Bölmənin digər xəbərləri
