TÜRKİYƏNİN BAŞ NAZİRİ RƏCƏB TAYYİB ƏRDOĞANIN BƏYANATI
-Hörmətli prezidentlər!
Dəyərli Baş nazir, dəyərli nazirlər!
Hörmətli qonaqlar!
Sizləri hörmət və ehtiramla salamlayıram. Öncə belə bir mənalı gecədə sizlərlə birlikdə olmaqdan böyük məmnuniyyət hissi keçirdiyimi ifadə etmək istəyirəm. Göstərdikləri qonaqpərvərliyə görə Gürcüstan Prezidenti hörmətli Saakaşvili başda olmaqla, Gürcüstanın rəsmi şəxslərinə öz adımdan və nümayəndə heyətimin üzvləri adından təşəkkür edirəm.
Azərbaycan Prezidenti hörmətli İlham Əliyevin də bu mərasimdə iştirak etməsi bizləri son dərəcə məmnun etmişdir. Çünki bu gün bir yerə toplaşmaqla birlikdə dünyaya çox mühüm mesaj veririk. Regional əməkdaşlıq necə ola bilər - bunun nümunəsini göstəririk. Regional əməkdaşlıq edərkən hazırda üçüncü addımı atırıq. Birinci addım, bildiyiniz kimi, Bakı-Tbilisi-Ceyhan neft kəməri idi. İkincisi, Bakı-Tbilisi-Ərzurum, digər adı ilə “Şahdəniz” layihəsi idi. İndi də üçüncü addımı atırıq. O da Bakı-Tbilisi-Qars layihəsidir, tarixi İpək yolunun artıq bir dəmir yoluna çevrilməsi hadisəsidir. Təbii ki, bunun arxasınca gələn müxtəlif layihələr də var. Ancaq bu həmrəylik, sadəcə, regional əməkdaşlıqla məhdudlaşmır. Eyni zamanda bu dəmir yolu üzərindəki hər bir stansiya bir sülh stansiyası, dostluq və həmrəylik stansiyası olaraq, dünyaya mesajını verir. Qafqazın vəziyyəti hər kəsə məlumdur. Ancaq indi Qafqaz bu regional əməkdaşlıqla fərqli bir mesaj verərək, artıq bir həmrəylik mərkəzi olduğunu nümayiş etdirir.
Hazırda Bakı-Tbilisi-Qars dəmir yolu layihəsi ilə bağlı Çərçivə Sazişinin imzalanması mərasimi münasibətilə bir yerə toplaşmışıq. Bu, çox mənalı görüşdür. Bu sənədi biz bu gün imzalayırıq. Ancaq bizdən sonra gələn nəsillər də bizləri xeyirlə yad edəcəklər. Mən indi bunu burada görürəm. Bu gün imza atdığımız bu layihə ilə müştərək gələcəyimizi qurur və müştərək tariximizin zənginliyini müştərək gələcəyə birlikdə aparırıq. Bu baxımdan bugünkü mərasim çox əhəmiyyətlidir. Xüsusilə qitələrin, dənizlərin, xalqların və mədəniyyətlərin bir-birinə qovuşduğu geosiyasi bir məkanda yerləşən ölkələrimizin tarixi və coğrafi məsuliyyətlərini dərk edirik.
İnşasına 2007-ci ildə başlanacaq dəmir yolunun Türkiyəyə aid layihəsi başa çatdırılmışdır, Gürcüstana aid layihə də sürətlə başa çatır. Ümid edirəm ki, dəmir yolunun təməlini yay aylarında birlikdə qoyacağıq və o, Xəzər hövzəsini Avropaya birləşdirəcəkdir. Yəni təsəvvür edin, Xəzərdən keçərək Asiyadan Çinə qədər uzanan yol, digər tərəfdən, İstanbul boğazından keçir və Avropanın ən ucqar guşələrinə qədər uzanır.
Bu layihənin başqa bir xüsusiyyəti də, hava yolu, avtomobil yolu ilə birlikdə, bölgədə nəqliyyat növləri və imkanlarının genişləndirilməsinə xidmət etməsidir.
Bir az əvvəl hörmətli Prezidentin də dediyi kimi, Tbilisi hava limanı yenidən qurulmuşdur və bir az sonra onun da açılışı olacaqdır. Bu işi bir Türkiyə şirkətinin görməsi bizi sevindirmişdir. Ən qısa zamanda Batumi hava limanının da açılışı olacaqdır. Bundan sonra Batumi və Trabzon hava limanları müştərək istifadəyə veriləcəkdir. Bütün bunlar xalqlarımız arasındakı əlaqələri möhkəmləndirməklə yanaşı, nəqliyyat sahəsində alternativ yolların artırılmasına da xidmət edəcəkdir.
Bu gün Qafqazda hələ də öz həllini tapmayan problemlər var. Biz onları dərk edirik. Bu münaqişələr tezliklə ədalətli həllini tapmalıdır. Türkiyə olaraq, biz indiyə kimi bu məqsədlə hər cür dəstək verdiyimiz kimi, bundan sonra da eyni mövqedə olacağıq.
Bir məsələni də xüsusilə vurğulamaq istəyirəm. İndi enerji təhlükəsizliyi dünyanın ən mühüm məsələlərindən biridir. Bilirəm ki, bizim də, Gürcüstanın da enerji məsələsində çətinlikləri var. Hazırda bu məsələdə ən əlverişli vəziyyətdə olan Azərbaycanın da müəyyən çətinlikləri var. Azərbaycan indi bu çətinliklərin öhdəsindən gəlmək səviyyəsinə çatmışdır. Aramızda olan həmrəylik bizim də yükümüzü azaldır, inanıram ki, bu həmrəylik bizi gələcəkdə daha yaxşı mövqeyə çatdıracaqdır. Necə ki, Bakı-Tbilisi-Ceyhan vasitəsilə dünya Azərbaycandan sanki nəfəs almaq imkanı əldə etdi, eləcə də, Bakı-Tbilisi-Ərzurum layihəsi vasitəsilə Avropa Azərbaycandan yenə bir nəfəs almaq imkanı əldə edəcəkdir. Çünki Yunanıstana qədər uzanan kəmər hazırda tamamlanmaqdadır. Bunun tamamlanması ilə Avropa bu sülh düşüncəsi ilə öz payını alacaqdır.
Mən göstərdikləri səylərə görə xüsusilə hörmətli prezidentlərə və Baş nazirlərə, nazirlərə, bu layihədə əməyi olan firmalara, bundan sonra əməyi olacaq firmalara istər öz adımdan, istərsə də ölkəm və millətim adından təşəkkür edirəm. Bu birliyimizin möhkəmlənərək davam etməsi arzusu ilə sizləri ən səmimi hisslərlə salamlayıram.
Bölmənin digər xəbərləri
