Türkiyənin beş türk ölkəsinə mal və məhsul ixracının həcmi 11 milyard dolları ötüb
Ankara, 19 fevral, AZƏRTAC
Son 4 il ərzində Türkiyənin Azərbaycan, Qazaxıstan, Türkmənistan, Özbəkistan və Qırğızıstana ümumi ixracı 2 dəfə artaraq 11 milyard dolları ötüb.
AZƏRTAC xəbər verir ki, bunu Türkiyə Statistika Qurumunun (TÜİK) çərşənbə günü, fevralın 19-da yerli mediada dərc olunmuş məlumatı göstərir.
TÜİK-in hesablamalarına görə, əgər 2020-ci ilin sonunda Türkiyənin beş türk dövlətinə ixracı 5,4 milyard dollar təşkil edirdisə, il ərzində tədarükün həcmi 7,2 milyard dollara yüksəlib. “2022-ci ildə türk dövlətlərinə ixrac 8 milyard dollara, 2023-cü ildə isə 9,9 milyard dollara çatıb. Nəhayət, ötən ilin yekunlarına görə, rekord həcmdə – 11,1 milyard dollaradək artım qeydə alınıb”, - deyə qardaş ölkənin statistika idarəsindən bildirilib.
Qazaxıstan 2024-cü ildə Türkiyə məhsullarının alış həcminə (3,3 milyard dollar) görə beş ölkə arasında lider olub.
Daha sonra Azərbaycan (3,1 milyard dollar), Özbəkistan (2,2 milyard dollar), Qırğızıstan (1,4 milyard dollar) və Türkmənistan (1,1 milyard dollar) gəlir.
Ötən il Türkiyənin beş türk dövlətinə ən çox ixrac etdiyi mallar arasında avadanlıqlar, qazanlar, mexaniki qurğular və reaktorlar olub (2,6 milyard dollar).
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
