Türkiyənin ən modern müdafiə sənayesi həm qardaş ölkəni, həm də Azərbaycanı gücləndirəcək
Bakı, 1 may, AZƏRTAC
Türkiyə və Azərbaycanın bugünkü strateji əməkdaşlığının yaxın tarixinə nəzər salsaq görərik ki, əsası Ulu Öndər Heydər Əliyev tərəfindən qoyulmuş Türkiyə ilə dostluq və qardaşlıq münasibətləri, “Bir millət, iki dövlət” prinsipi ilə hazırda uğurla inkişaf edir. Prezident İlham Əliyev hələ 2010-cu ildə qardaş ölkəyə səfər edərək Prezident Rəcəb Tayyib Ərdoğanla strateji tərəfdaşlıq sazişi imzalandı. 2020-ci ildə Qarabağ işğaldan azad edildiyi zaman Türkiyə Azərbaycana siyasi və mənəvi dəstək göstərdi. Selçuk Bayraktarın rəhbərlik etdiyi “Bayraktar” şirkətinin istehsalı olan pilotsuz uçuş hava vasitələrinin Qarabağın səmalarında uçması bizim qardaşlıq rəmzimizi əks etdirdi.
Bu fikirləri AZƏRTAC-a müsahibəsində Həmvətənlərə Dəstək İctimai Birliyinin təsisçisi, Qarabağ müharibəsi veteranı, ehtiyatda olan polkovnik-leytenant, hərbi-siyasi ekspert Elmar Hüseyn deyib.
O xatırladıb ki, bu festival Türkiyənin bir çox şəhərlərində keçirilməkdədir. Ötən il “TEKNOFEST” aerokosmik və texnologiya festivalı ilk dəfə Türkiyədən kənarda - Azərbaycanda keçirilmişdi. Həmin festivalın açılış mərasimində Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan, eləcə də Nobel mükafatı laureatı Əziz Səncər iştirak etmişdilər. O vaxt “TEKNOFEST Azərbaycan” festivalını 300 minə yaxın insan ziyarət etmişdi. Festival çərçivəsində təşkil olunan üç beynəlxalq tədbir və səkkiz texnoloji müsabiqədə 5 mindən çox gəncin formalaşdırdığı 1000-dən çox komanda yarışmışdı. Hələ o dövrdə Prezident İlham Əliyev Azərbaycan gənclərinin İstanbuldakı “TEKNOFEST”də iştirakının təmin olunması üçün tövsiyələrini vermişdi. Bu məqsədlə Selçuk Bayraktar ölkəmizə səfəri zamanı Azərbaycan Texniki Universitetində gənclərin fikir və ideyaları ilə maraqlanmış və onları İstanbuldakı “TEKNOFEST”də iştirak etməyə dəvət etmişdi. Beləliklə, bu il Türkiyədə keçirilmiş “TEKNOFEST”də Azərbaycandan 30-dan çox gənc yaradıcı, yəni müasir hərbi-texnoloji məhsulları ilə layihələrini Selçuk Bayraktara təqdim etmişdilər.
Hərbi-siyasi ekspertin sözlərinə görə, Azərbaycan-Türkiyə əməkdaşlığının əsas istiqamətlərindən biri də aerokosmik elektron sistemlərin, kəşfiyyat xarakterli məmulatlar əldə etmək üçün hərbi vasitələrin inkişaf etdirilməsidir. Azərbaycanın “Space1”, “Space2” süni peykləri də Türkiyənin və Azərbaycanın gələcək hərbi strateji tərəfdaşlıqları ilə “Bayraktar” şirkəti ilə səmərəli fəaliyyət göstərəcək.
Azərbaycanın Müdafiə Nazirliyi ilə Türkiyənin “Bayraktar” şirkəti arasında müqavilə imzalanıb və Azərbaycanda da bu şirkətin mərkəzi açılacaq. Türkiyədən mütəxəssislərlə yanaşı, azərbaycanlı mütəxəssislərin də çalışacağı mərkəzdə yeni ideyalar və dağlıq gecə şəraitində fəaliyyət göstərəcək texniki vasitələrin imkanları yoxlanılacaq.
Azərbaycan Müdafiə Sənayesi Nazirliyi İkinci Qarabağ müharibəsi dövründə “İtiqovan” pilotsuz kamikadze dronu hazırlayıb. Bu gün Türkiyədə kamikadze dronlar, pilotsuz uçuş aparatları hazırlanır.
Ehtiyatda olan polkovnik-leytenant deyib ki, İstanbuldakı “TEKNOFEST”də “Kızılelma” pilotsuz uçuş aparatının səmada manevrləri izlənildi. “Kızılelma” düşmənin radar sistemlərindən kənarlaşaraq uzun məsafədə tapşırıqlar icra etmək üçün reallaşdırılan ən möhtəşəm layihələrdən biridir. Azərbaycan Prezidenti Türkiyədəki festivalda çıxışı zamanı istehsalına başlanılan son texnoloji avadanlıqların ölkəmizə gətiriləcəyini və tətbiq ediləcəyini bildirdi. Azərbaycanda “Bayrakdar” Mərkəzinin yaradılacağının, “Kızılelma” pilotsuz zərbə təyyarələrinin ölkəmizin hava məkanında görünəcəyinin, “Togg” elektromobillərinin alışının təşkilinin anonsunu verdi. “Kızılelma” pilotsuz idarə olunan qırıcı təyyarə funksiyasını yerinə yetirir və hava məkanının qorunması üçün mühüm əhəmiyyət kəsb edir. Prezident İlham Əliyev havada “Kızılelma”, dənizdə "Anadolu", quruda “Altay" və "Togg" olacaq” fikrini səsləndirməklə bütün dünyaya mesaj verdi ki, Azərbaycanla Türkiyə arasında hərbi, siyasi, iqtisadi sahədə müttəfiqlik daha yüksək səviyyəyə çatdırılacaq.
“Digər tərəfdən dövlətimizin başçısı İstanbulda ən inkişaf etmiş və modern müdafiə sənayesinin həm Türkiyəni, həm Azərbaycanı gücləndirdiyini və uzun illər bundan sonra qardaş ölkənin təhlükəsizliyini təmin edəcəyini qeyd etdi. Odur ki, Türkiyənin təhlükəsizliyi həm də Azərbaycanın, eləcə də Cənubi Qafqazın təhlükəsizliyidir. 100 il əvvəl Qars müqaviləsinin imzalanması Naxçıvanin düşmən çənbərində təhlükəsizliyini təmin etdiyi kimi, Şuşa Bəyannaməsi də Azərbaycanın təhlükəsizliyinə təminat verməkdədir. Ona görə Azərbaycanın müvafiq qurumları ilə “Bayraktar” şirkətinin birgə həyata keçirəcəyi pilotsuz uçuş aparatları ilə bağlı layihələr Azərbaycanı iri və uzaq mənzilli raketlərlə təhdid edən ölkələrə qarşı ən gözəl cavabdır.
Bu gün “Su-25” və “MiQ-29” kimi pilotlu hava təyyarələrin alınması, onların ehtiyat hissələrinin istismarı, həmçinin ekipajların hazırlanması böyük maliyyə tələb etdiyi üçün bu sahədə Azərbaycan və Türkiyənin birgə fəaliyyəti, pilotsuz uçuş aparatlarının istehsalı xarici ölkələrdən asılılığı azaltmaq kimi strateji maraqlara xidmət edir. Biz unutmamalıyıq ki, vaxtilə “Şahdəniz” yatağının istismarı zamanı da türkiyəli pilotların hazırladığı Azərbaycan şahinləri Xəzər dənizi üzərində uçuş edərək ölkəmizin neft sektorlarının, Bakıda keçirilmiş “Teknofest”də “AKINCI”lar Türkiyədən uçaraq ölkəmizə gələrək festivalın təhlükəsiziyini təmin edərək dünyaya mesaj vermişdi”, - deyə Elmar Hüseyn vurğulayıb.
Bölmənin digər xəbərləri
