Türkiyənin gələcəyi və inkişafı Prezident Rəcəb Tayyib Ərdoğanla sıx bağlıdır – Rəy
Bakı, 26 aprel, Ramiz Quliyev, AZƏRTAC
Son illər siyasi, iqtisadi və hərbi sahədə sürətlə inkişaf edən Türkiyə nəinki regionda, həmçinin beynəlxalq müstəvidə real güc mərkəzinə çevrilib. Bu uğurların və nailiyyətlərin qazanılmasında Prezident Rəcəb Tayyib Ərdoğanın xidmətləri xüsusilə qeyd olunmalıdır.
AZƏRTAC xəbər verir ki, bu fikirləri tanınmış memar Fəzail Bayramov bildirib.
Memar qeyd edib ki, məhz Prezident Rəcəb Tayyib Ərdoğanın hakimiyyəti illərində Türkiyədə demokratik dəyərlər daha da möhkəmləndi və ölkə dövlət quruculuğunun əsasını təşkil edən islahatlara qədəm qoydu. Pul islahatı aparıldı, inflyasiyanın səviyyəsi aşağı düşməyə başladı, iri tikinti, sosial müəssisələrin və digər zəruri obyektlərin inşası həyata keçirildi.
Onun sözlərinə görə, TANAP və TAP kəmərləri vasitəsilə Azərbaycan qazının Avropaya çatdırılmasında qardaş Türkiyənin rolu danılmazdır: “Dost ölkə bununla öz iqtisadiyyatını gücləndirməklə yanaşı, Avropanın enerji təhlükəsizliyinə töhfəsini verir. Qara dənizdə Türkiyə sahillərində böyük qaz yatağı aşkar edilib ki, onun da həcmi 540 milyard kubmetr qiymətləndirilir. Qara dənizdə aşkar edilən qaz 35 il ərzində məişət ehtiyaclarını ödəməyə qadirdir və əhali may ayından etibarən ondan öz evlərində istifadə edə biləcək”.
F.Bayramov vurğulayıb ki, Türkiyə Rəcəb Tayyib Ərdoğanın rəhbərliyi ilə son 20 ildə böyük tarixi yol qət edib və dünyanın inkişaf etmiş nəhəng sənaye ölkəsinə çevrilib. Yeni texnologiyaların tətbiqi sayəsində əldə edilən nailiyyətlər dost və qardaş ölkəni dünya səviyyəsində söz sahibi edib: “Bu gün müdafiə sənayesi sahəsində layihələndirilən məhsulların sayı 11 dəfə artıb, bu sahədə çalışan şirkətlərin sayı artıq yüzlərlədir. Müasir dövrümüzün sensasiyası sayılan silahlı uçuş aparatlarının istehsalı və dost ölkələrə satışı bu sahədə qardaş ölkənin əldə etdiyi ən böyük uğurlardan biridir. Ən son texnologiyalarla təchiz edilən “Bayraktar” pilotsuz uçuş aparatlarının, “Baryaktar TB3” pilotsuz təyyarələrinin və “TCG Anadolu” desant gəmisinin istehsalı məhz ölkə rəhbərinin hakimiyyəti dövründə əldə edilən uğurların yalnız bir hissəsidir. Bu müasir silahdan Azərbaycan Ordusunda da müvəffəqiyyətlə istifadə edilir”.
Türkiyə regionda da sülhün və sabitliyin təmin edilməsində ciddi və məqsədyönlü işlər görür. Prezident Rəcəb Tayyib Ərdoğanın səyi nəticəsində dünyanı bürüyən taxıl böhranının qarşısı alınıb. Eyni zamanda, Rusiya ilə Ukrayna arasında davam edən müharibədə barışıq missiyasını yerinə yetirən Türkiyə Prezidenti taxıl dəhlizinin səmərəli və təhlükəsiz fəaliyyət göstərməsində də uğurlu siyasət yürüdür.
Türkiyənin gələcəyi, inkişafı, müstəqil siyasəti məhz onun lideri, dövlət başçısı Rəcəb Tayyib Ərdoğanla sıx bağlıdır. Türkiyədə may ayında keçiriləcək prezident seçkilərinin də xalq arasında böyük nüfuza malik Rəcəb Tayyib Ərdoğanın qələbəsi ilə nəticələnəcəyinə inanırıq.
Bölmənin digər xəbərləri
