TÜRKİYƏNİN KƏND TƏSƏRRÜFATI MÜTƏXƏSSİSLƏRİ NAXÇIVANDA HƏMKARLARI İLƏ GÖRÜŞMÜŞLƏR

17.04.2004 [11:47]
Çap et
A⁺ A^-

AZƏRTAC-ın müxbiri xəbər verir ki, Naxçıvanda səfərdə olan Türkiyənin Kənd Təsərrüfatı Nazirliyinin nümayəndələri Muxtar Respublikada aqrar sahənin vəziyyəti ilə tanış olmuş, öz həmkarları ilə ekoloji cəhətdən təmiz qida məhsulları istehsalı ilə bağlı söhbət etmiş, fikir mübadiləsi aparmışlar.

Naxçıvan Müəllimlər İnstitutunda “Ekoloji cəhətdən təmiz qida məhsulları yetişdirilməsi” mövzusunda müşavirə keçirilmişdir. Müşavirədə qeyd edilmişdir ki, türkiyəli mütəxəssislərin Naxçıvana bu səfəri Muxtar Respublikada kənd təsərrüfatı sistemi, onun idarə olunması, torpaq xüsusiyyətləri ilə tanışlıq məqsədi daşıyır.

Müşavirədə türkiyəli mütəxəssislər ekoloji cəhətdən təmiz kənd təsərrüfatı məhsulları yetişdirməklə bağlı məruzələr etmişlər.

Müşavirədə qeyd edilmişdir ki, SSRİ dövründə mineral gübrələrin və zəhərli maddələrin torpağa normadan çox verilməsi nəticəsində əkin sahələri çirklənmişdir. Bu proses yeraltı sulara da öz mənfi təsirini göstərmişdir. Lakin Azərbaycan dövlət müstəqilliyi əldə etdikdən sonra bu sahədə qayda yaradılmış, Naxçıvan ərazisində torpaq və suyun təmizlənməsi prosesi başlanmışdır.

Türkiyəli mütəxəssislər müşavirə iştirakçılarına məsləhətlər vermiş, onların suallarını cavablandırmışlar.