TÜRKİYƏNİN MİLLİ BAYRAMI ŞƏRƏFİNƏ
Səfir Turan Moralı bayram mərasiminə toplaşanları salamlayaraq dedi ki, bu gün həm də Atatürkün anadan olmasının 125-ci ildönümüdür. Diplomat vurğuladı ki, Cümhuriyyət günü dünyanın heç bir yerində belə əzəmətli qeyd olunmur. Bu, təsadüfi deyildir. Azərbaycan və Türkiyə iki dövlət bir millətdir. Türkiyə və Azərbaycan dövlətlərinin beynəlxalq aləmdə layiqli mövqe tutması çox çətin mübarizə nəticəsində baş vermişdir.
Sonra səfir Azərbaycanın və Türkiyənin XX əsrin əvvəllərindəki tarixinə qısa ekskurs etdi, Birinci və İkinci dünya müharibələrini, soyuq müharibə dövrünü xatırlatdı, həmin dövrlərdə Türkiyə-Azərbaycan münasibətlərinin Şərqlə Qərbin ideoloji və strateji mübarizəsinin qurbanı olduğunu yada saldı.
Səfir son zamanlar Azərbaycan ilə Türkiyə arasında sarsılmaz birliyin yaranıb formalaşmasını, bu işdə ümummilli lider Heydər Əliyevin əvəzsiz rolunu vurğuladı. Diplomat Azərbaycanı demokratik, dinamik inkişaf etməkdə olan bir ölkəyə çevirməkdə, Türkiyə-Azərbaycan qardaşlığının möhkəmlənməsində əvəzsiz xidmətləri olan ümummilli liderimiz Heydər Əliyevin əziz xatirəsinə dərin hörmət və ehtiramını bildirdi. T.Moralı dedi ki, bu gün Türkiyə və Azərbaycan respublikaları bütün maneələrə və siyasi oyunlara qalib gələrək sıx birliyə nail olmuşlar, ölkələrimiz iqtisadi cəhətdən inkişaf edərək gələcəyə inamla addımlayırlar. Möhtərəm Prezident İlham Əliyevin apardığı uğurlu siyasət sayəsində Azərbaycan regionun lider dövlətinə çevrilir. Qardaş Azərbaycanın iqtisadi cəhətdən qüdrətlənməsində Türkiyə iş adamları da səylərini əsirgəmirlər.
Beynəlxalq aləmdə baş verən mürəkkəb proseslərə toxunan səfir qeyd etdi ki, belə bir şəraitdə bəsirətli və ləyaqətli siyasət yeritmək zəruridir. Türkiyə və Azərbaycan qərb demokratiyasına inteqrasiya etməyi, bu demokratiyanın dəyərlərinə yiyələnməyi qarşısına məqsəd qoymuşlar. Təəssüf ki, Ermənistan dövləti və erməni diasporunun yanlış siyasəti bu nəcib məqsədi reallaşdırmağa mane olur.
Səfir Ermənistan-Azərbaycan, Dağlıq Qarabağ münaqişəsinə, bu münaqişəyə qərbin ikili münasibətinə, qondarma “erməni soyqırımı”na, bəzi ölkələrin parlamentlərinin bu “soyqırımı”nı tanımasına, Türkiyənin öz arxivlərini tarixçilərin üzünə açmağa hazır olduğuna da toxunmuşdur. Diplomat inamla vurğulamışdır ki, bu oyunlar çox davam edə bilməz. Həm Türkiyə, həm də Azərbaycan onların qarşısında möhkəm dayanacaqlar. Bu, gələcək nəsillər qarşısında borcumuzdur.
Öz diplomatik missiyasını başa çatdıraraq ölkəmizdən ayrılacağını bildirən səfir, respublikamızda ona göstərilən qonaqpərvərliyə görə Azərbaycan xalqına təşəkkürünü yetirdi.
Sonra mərasimdə Milli Məclisin sədri Oqtay Əsədov çıxış etdi. O, əlamətdar gün münasibətilə mərasim iştirakçılarını, bütün türk xalqını Azərbaycan Prezidenti İlham Əliyevin adından təbrik etdi, dövlətimizin başçısının salamlarını və xoş arzularını çatdırdı. Natiq sözünə davam edərək dedi ki, Türkiyə Cümhuriyyəti böyük Mustafa Kamal Atatürkün ölməz əsəridir. Ötən 83 il ərzində türk cümhuriyyətinin parlaq inkişaf yolu keçməsi türk xalqının nəyə qadir olduğunu bir daha sübut etmişdir. Türk xalqı dünya birliyində öz layiqli və dəyərli yerini tutmuşdur. Azərbaycan- Türkiyə əlaqələri qədim və zəngin tarixə malikdir. Biz dili bir, dini bir, kökü bir olan xalqlarıq.
Parlamentin sədri ümummilli lider Heydər Əliyevin “Bir millət, iki dövlət” kəlamını xatırladaraq demişdir ki, Azərbaycan öz suverenliyini bərpa etdikdən sonra onun müstəqlliyini ilk tanıyan Türkiyə dövləti olmuşdur və bu, Azərbaycan xalqının yadından heç vaxt çıxmayacaqdır. Müstəqillik dövründə Azərbaycan-Türkiyə münasibətləri çox sürətlə inkişaf edərək hazırda strateji tərafdaşlıq səviyyəsinə gəlib çatmışdır. Azərbaycan və Türkiyə dövlət başçılarının ikitərəfli əlaqələrə verdikləri böyük əhəmiyyət öz əksini bu illər ərzində dövlətlərimiz arasında imzalanmış yüzlərlə siyasi və hüquqi sənəddə tapmışdır. Bu hüquqi bazanın əsasında Azərbaycan iş adamları Türkiyədə, türk iş adamları Azərbaycanda çalışırlar. Natiq bu illər ərzində türk iş adamlarının Azərbaycan iqtisadiyyatına 2 milyard ABŞ dolları məbləğində sərmayə yatırdığını xatırladaraq bildirdi ki, Azərbaycan və Türkiyənin səyləri nəticəsində regionda, eləcə də dünyada çox mühüm layihələr həyata keçirilmiş və keçirilməkdədir. Bakı-Tbilisi-Ceyhan əsas ixrac boru kəməri artıq işə düşmüşdür. İlin axırına kimi Bakı-Tbilisi-Ərzurum qaz kəməri işə düşəcəkdir. İrəlidə bizi iri layihələr gözləyir.
Parlamentin sədri xüsusi vurğuladı ki, beynəlxalq məsələlərdə Azərbaycan və Türkiyə öz xarici siyasətlərini uzlaşdırırlar, beynəlxalq məsələlərdə ölkələrimizin mövqeləri həmişə üst-üstə düşür. Natiq Fransa parlamentinin alt palatasının məlum qərarına Azərbaycan Milli Məclisinin münasibətini də xatırlatdı.
Oqtay Əsədov parlamentlərarası əlaqələrdən də danışdı. Dedi ki, həm Azərbaycan Milli Məclisində, həm də Türkiyə Böyük Millət Məclisində dostluq qrupları uğurla fəaliyyət göstərir.
Mərasimdə Prezidentin İcra Aparatının nümayəndələri, Milli Məclisin deputatları, nazirlər, dövlət komitələrinin sədrləri, siyasi partiyaların, qeyri-hökumət təşkilatlarının təmsilçiləri, xarici ölkələrin Bakıdakı səfirləri, elm, ədəbiyyat, incəsənət xadimləri iştirak edirdilər.
Bölmənin digər xəbərləri
