Ucarda vətəndaşların ədliyyə fəaliyyəti ilə bağlı qəbulu keçirilib
Bakı, 23 fevral, AZƏRTAC
Fevralın 23-də ədliyyə naziri vəzifəsini müvəqqəti icra edən Azər Cəfərov Ucar rayonunda vətəndaşları qəbul edib, onların müraciətlərini dinləyib, ərizə və şikayətlərinə baxıb.
Ədliyyə Nazirliyinin mətbuat xidmətindən AZƏRTAC-a verilən məlumata görə, dövlət başçısı İlham Əliyevin tapşırığına və bölgələrdə vətəndaşların qəbulu cədvəlinə əsasən təşkil olunan görüşdə Ucar, Zərdab, Kürdəmir və digər rayonlardan olan vətəndaşlar iştirak ediblər.
Əvvəlcə Ümummilli Lider Heydər Əliyevin Ucar şəhərində abidəsi ziyarət edilərək əziz xatirəsi dərin ehtiramla yad olunub.
Qəbulda ədliyyə fəaliyyətinin ayrı-ayrı sahələri ilə bağlı müraciətlərə baxılıb, müharibə iştirakçılarının və şəhid ailələrinin qayğıları ilə maraqlanılıb. Onların həlli ilə bağlı müvafiq tədbirlər görülüb, araşdırma tələb edən digər müraciətlər nəzarətə götürülüb.
Azər Cəfərov bölgə sakinləri ilə görüşdə ölkə Prezidentinin fəaliyyətinin və dövlət siyasətinin mərkəzində Azərbaycan vətəndaşının və onun rifahının dayandığını, onların müraciətlərinə qayğı və həssaslıqla yanaşılması ilə bağlı tapşırıqlarının daim diqqətdə saxlanıldığını bildirib.
Vətəndaşlar müstəqillik illərində ölkəmizin ilk dəfə bütün ərazisində yüksək fəallıq və vətəndaş həmrəyliyi ilə keçirilən seçkilərdə yenidən dövlət başçısı seçilməsi münasibətilə Prezident İlham Əliyevə sonsuz məhəbbət və ehtiramını ifadə ediblər.
Səfər zamanı, həmçinin nazirliyin yerli qurumlarına və məhkəməyə baş çəkilib, həmin orqanların infrastrukturu və iş şəraiti ilə tanışlıq olub. Ədliyyə işçilərinə fəaliyyətin müasir çağırışlara uyğun təşkili, vətəndaş məmnunluğunun yüksəldilməsi, etik davranış qaydalarına dönmədən əməl olunması ilə bağlı tapşırıq və tövsiyələr verilib.
Bölmənin digər xəbərləri
