Üç günə qarşı 30 günlük atəşkəs təklifi
Kiyev, 29 aprel, AZƏRTAC
Rusiya Prezidenti Vladimir Putinin Qələbə Günü ilə bağlı elan etdiyi 3 günlük atəşkəs Ukrayna tərəfindən razılıqla qarşılanmır. Rəsmi Kiyev 30 günlük atəşkəsi təklif edir. Bununla bağlı hələ ki, Moskvadan müsbət cavab verilməyib. Ukrayna Prezidenti Volodimir Zelenski də rusiyalı həmkarının 3 günlük atəşkəs ideyasını növbəti manipulyasiya adlandırıb. Bunu, sadəcə, Rusiyanın öz paradını sakit keçirmək cəhdi kimi qiymətləndirib. Zelenski bildirib ki, 8 mayı gözləmədən biraylıq tam olaraq atəşkəs elan edilməlidir.
Ukraynanın bəzi ekspertləri isə hesab edir ki, qarşılıqlı razılaşma olmasa, 9 May paradında Ukrayna tərəfindən hava hücumları mümkün ola bilər.
“Amerika Prezidenti Donald Trampın sülh, atəşkəs çağırışından sonra Rusiya Federasiyası oyun oynamağa başlayıb. Onlar atəşkəs təklif edəndə, buna əməl etmirlər. Rusiya publika qarşısında atəşkəs istəməklə, Tramp qarşısında özlərini guya sülh carçısı kimi göstərmək istəyir. “Pasxa atəşkəsi” zamanı heç bir atəşkəs olmadı. Növbəti atəşkəs elanı da çox güman ki, mümkün olmayacaq. Yəni, Rusiyanın atəşkəs elanı sadəcə sözdədir. Bunları görən Ukrayna ona görə də deyir ki, nəyə görə bir neçə günlük atəşkəs olmalıdır? Gəlin, Donald Trampın da dediyi kimi 30 günlük atəşkəs elan edək”, - deyə AZƏRTAC-a açıqlamasında ukraynalı ekspert İvan Us bildirib.
Ekspertin sözlərinə görə, Ukrayna faktiki olaraq Donald Trapın da istəyində olduğu təkliflə çıxış edir: “Ancaq Rusiya nə Trampın, nə də Ukraynanın istədiyi atəşkəsə getmir. Ona görə də özünün üçgünlük atəşkəsini istəyir. Bir məsələni yaddan çıxarmaq olmaz. Əgər qarşılıqlı olaraq Ukrayna 3 günlük atəşkəsə razılıq verməsə, bu, baş tutmayacaq. Rusiya, sadəcə, 9 May paradını sakit keçirmək üçün bu təkliflə çıxış edir. Onlar parad zamanı Ukrayna tərəfindən hər hansı hava hücumunun olmasını istəmir, kover elan edib, aeroportlarını bağlamaq istəmirlər. Ukrayna mayın 1-dən 30 günlük atəşkəs təklif edir. Rusiya isə bundan imtina edərsə, onda Ukrayna da 3 günlük atəşkəsə razı olmayacaq. Bu isə o deməkdir ki, 9 May paradında Ukrayna tərəfindən hava hücumları mümkündür”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
